Deputeti Lulzim Basha tha se ishte pro listave të hapura të kandidatëve në të gjithë vendin, duke theksuar se vetëm kështu vota e qytetarëve do të ishte përcaktuese për përfaqësuesit e tyre.
Basha e konsideroi një ndryshim thelbësor për demokracinë shqiptare atë të listave të hapura 100%.
Ai tha se është e pamoralshme që një kandidat që merr 9900 vota nuk hyn dot në Parlament sepse nuk arrin të thyejë herësin e 10 mijë votave, ndërkohë që merr mandatin e deputetit dikush që ka marrë 2 mijë vota, por renditet në krye të listës së propozuar nga kryetari.
“Ftesa imë është ti besojmë vetëm qytetarëve dhe mënyra e vetme janë listat e hapura”, theksoi Basha.
Ai tha se sot në Shqipëri nuk pyet njeri se çfarë aftësish ke, por nëse je djali i x apo y mund të ecësh përpara.
Basha riktheu në vëmendje vettingun e politikanëve, të cilin e konsideroi një mekanizëm që do të mbajë larg ata njerëz që mund të blejnë votat dhe të marrin mandatet e deputetëve.
“Në kushtet kur drejtësia është në hapat e parë të saj, vettingu i politikanëve është një emergjencë kombëtare, si e vetmja rrugë që do të mund të pastrojë politikën nga ata që hyjnë për interesat e tyre”, tha Basha. Ai shtoi se listat e hapura pa vetting politik nuk do të mund të japin rezultatin e duhur, ndaj dhe janë të lidhura bashkarisht.
Në vijim, deputeti demokrat tha se duhet të ketë një kufizim mandatesh. “Ka ardhur koha që në Shqipëri ti vemë fre egove të sëmura. Asnjë Kryeministër që nuk arrin të realizojë premtimet për dy mandate, të pretendojë mandatin e 3-të”, tha Basha.
Discussion about this post