Deputetët demokratë, pjesë e grupimeve që drejtohen nga Sali Berisha dhe Gazment Bardhi, janë mbledhur në Kukës, qytet në të cilin në 24 shtator do të mbahen zgjedhjet e pjesshme vendore për zgjedhjen e kryebashkiakut të ri.
Pikërisht është kjo arsyeja që takimi i 3-të zyrtar mes deputetëve që i përkasin dy grupimeve në rradhët e demokratëve po mbahet në Kukës, duke dhënë mesazhin e një bashkimi, por edhe mbështetjes ndaj kandidatit të mbështetur nga koalicioni “Bashkë Fitojmë”, Emri Vata.
Ashtu sikundër pritej deputetët që janë në mbështetje të Lulzim Bashës nuk i janë bashkuar kësaj tryeze. Madje subjekti i PD-së, që drejtohet nga Basha, nuk ka as kandidat për kryebashkiak në Kukës, edhe pse me vendim të Kolegjit Zgjedhor do të kenë dy anëtarë në Komisionet e Qendrave të Votimit.
Tryeza e sotme në Kukës pritet të konkludojë me një mesazh mbështetjeje për kandidatin Vata, ndërsa pritet të përcaktohet edhe qëndrimi që do të mbajë grupimi i deputetëve në seancën plenare të së enjtes.
Në dy tryezat e para të zhvilluara theksi është vënë në rolin që duhet të luajë opozita parlamentare për të denoncuar keqqeverisjen si dhe skandalet e Qeverisë Rama.
Discussion about this post