Kryeministri Edi Rama ka zhvilluar një takim me homologun e tij të Holandës, Mark Rutte, në selinë e OKB.
Në një postim në Facebook, shoqëruar me foto nga takimi, Rama jep lajmin se kryeministri holandez do të vizitojë Shqipërinë më 10 nëntor për të rikonfirmuar, siç thekson kryeministri shqiptar, mbështetjen për negociatat.
“Në selinë e OKB me kryeministrin e Mbretërisë së Hollandës, Mark Rutte, i cili do të vizitojë Shqipërinë në 10 nëntor, për të rikonfirmuar mbështetjen e plotë të Hollandës për nisjen formale të negociatave për anëtarësim në Bashkimin Europian”, shkruan kryeministri Rama.
Holanda ka qenë gjithmonë një nga vendet kritike ndaj Shqipërisë, duke ngritur “kartonin e kuq” gjatë konferencave ndërqeveritare për integrimin e vendit në Bashkimin Europian. Ndërkohë që Rama ndodhet në SHBA prej disa ditësh, pasi po merr pjesë në Asamblenë e 76-të të OKB-së që po zhvillohet në Nju York.
