Dhoma Amerikane Tregtisë ka reaguar në lidhje me taksën e pronës duke e konsideruar projektligjin me probleme thelbësore në konceptim dhe në shkrim.
Në një letër drejtuar ministres së Financave dhe Ekonomisë, Delina Ibrahimaj, Dhoma Amerikane Tregtisë ngre shqetësimin se ndryshimet e propozuara 4-fishojnë normën e taksës së pasurisë duke rënduar mbi qytetarët.
Rishikimi i metodologjisë së vlerësimit, duke filluar nga çmimet e referencave, por dhe vendosja e një norme të vetme tatimore për taksën e pasurisë janë disa nga kërkesat që anëtarët sugjerojnë të përfshihen në këtë projektligj.
Reagimi
Projektligji mbi taksën e pasurisë së paluajtshme, i cili është aktualisht në fazën e konsultimit publik, konsiderohet i një rëndësie të madhe si për Dhomën Amerikane të Tregtisë, ashtu edhe për komunitetin e biznesit dhe publikun në tërësi, pasi sjell një reformim rrënjësor të sistemit të taksimit të pasurive të paluajtshme në Shqipëri.
Ky projektligj targeton çdo segment shoqëror nga individi deri tek kategoritë e biznesit që do ta përdorin pronën si aset në veprimtarinë e tyre. Ekspertët e Komitetit të Taksave dhe Doganave si edhe të Komitetit të Ligjeve, kanë analizuar në rrafshin konceptual, por edhe në teknikën legjislative risitë që sjell projektligji dhe impaktin e tij. Në përpjekjen për të ndikuar në formimin e një ligji të qartë që nuk lë shteg për interpretime dhe realizimin e reformës strukturore për të cilën është hartuar, AmCham beson se projektligji ka nevojë për ndërhyrje serioze që kanë në fokus format e vlerësimit të pronës, ofrimin e sigurisë për ruajtjen e saj si dhe zhvillimin e pronës në mënyrë të drejtë si një kolateral i nevojshëm për biznesin. Duke qenë një ligj kompleks i cili rikonceptualizon taksën mbi pasurinë e paluajtshme, procesi i konsultimit për këtë projektakt duhet të jetë sa më gjithëpërfshirës dhe intensiv, për të marrë mendime nga ekspertët dhe gjithë grupet e interesit.
Në një letër të detajuar që prek termat themelorë të projekligjit, AmCham i ka kërkuar Ministrisë së Financave të rishikojë metodologjinë e vlerësimit, duke filluar nga çmimet e referencave, të cilat duhet të reflektojnë vlerën reale të tregut, deri tek tagri i pakufizuar që i është dhënë pushtetit vendor. E shoqëruar kjo me sfondin kaotik që ka krijuar mungesa e një baze të saktë të të dhënave për pasuritë e paluajtshme, shërben për të rritur konfuzionin sidomos kur flitet për procedura të vetëdeklarimit të pasurive të paluajtshme që nuk janë të regjistruara në Kadastër. Në të njëjtin rrafsh të konfuzionit konceptual qëndron edhe ekzistenca e dy regjistrave në lidhje me të njëjtat të dhëna, Kadastra Fiskale dhe Regjistri Kadastral. AmCham e konsideron shumë të rëndësishëm që ky projektligj të hartohet duke marrë në konsideratë legjislacionin ekzistues në Shqipëri, qoftë ligjin për procedurat tatimore, qoftë Kodin e Procedurave Administrative apo ligje të tjera, të cilat tashmë kanë një praktikë të konsoliduar.
Ekspertët e AmCham në një garë me kohën dhe ditët e nxehta të verës, kanë mundur të draftojnë një përqasje të argumentuar me fakte mbi projektligjin, i cili do të marrë jetë në fillim të 2026-ës për ndërtesat dhe në 2028-ën për truallin, por “nxitoi” me afatin kohor duke thyer edhe njëherë pritshmërinë për organizimin e një konsultimi publik që mundëson zhvillimin e një diskutimi konkret mes ekspertësh për finalizimin e një draftligji që na shërben të gjithëve.
Discussion about this post