Trajneri i Spanjës, Luis de la Fuente, ka bërë të ditur se skuadra e tij nuk do të përdorë një markim individual ndaj Lionel Messit në finalen e Kupës së Botës 2026 kundër Argjentinës.
Pavarësisht se kapiteni argjentinas ka realizuar 8 gola dhe ka dhënë 4 asistime në këtë Botëror, De la Fuente beson se mënyra më e mirë për ta ndalur është përmes organizimit të ekipit dhe jo duke vendosur një lojtar vetëm pas tij.
Trajneri spanjoll tregoi edhe një histori nga takimi i parë me Messin, 22 vite më parë, kur ylli argjentinas ishte vetëm 16 vjeç dhe luante për ekipet e të rinjve të Barcelonës.
“Vendosëm një lojtar për ta markuar. Në minutën e 70-të ishte 0-0. Pasi lojtari që e ndiqte mori karton të verdhë, e zëvendësova. Brenda 15 minutash Messi shënoi katër gola”, rrëfeu De la Fuente.
Ai shtoi se kjo përvojë nuk do të ndryshojë qasjen e Spanjës në finale.
“A do ta markojmë? Jo. A do t’i kushtojmë vëmendje të madhe? Po, por njësoj siç do të duhet ata t’u kushtojnë vëmendje lojtarëve tanë”, tha trajneri.
Duke folur për yllin e ri të Spanjës, Lamine Yamal, De la Fuente theksoi se ai nuk duhet të krahasohet me Messin. “Messi nuk mund të përsëritet. Lamine duhet të jetë Lamine”, deklaroi ai.
Trajneri spanjoll shprehu gjithashtu respekt të madh për Argjentinën dhe Lionel Scalonin, duke refuzuar idenë se kampionët në fuqi përdorin lojë të ashpër.
Sipas tij, Argjentina është një skuadër historike që ka fituar Copa América, Botërorin, Copa América 2024 dhe Finalissiman.
Finalja mes Spanjës dhe Argjentinës do të jetë një përballje mes dy prej skuadrave më të forta të turneut, ku në qendër të vëmendjes do të jetë dueli mes eksperiencës së Messit dhe brezit të ri spanjoll të udhëhequr nga Yamal.
Discussion about this post