Talebanët kanë shpallur fitoren në provincën Panjshir, e vetmja fortesë rezistence e pa pushtuar nga ata. Lajmin e bëri të ditur zëdhënësi i talebanëve, Zabihullah Mujahid i cili u shpreh se tashmë i gjithë vendi është nën kontrollin e tyre.
Pas marrjes së kontrollit në provincën Panjshir, talebanët postuan disa foto në rrjetet sociale, duke qëndruar para portës së kompleksit të guvernatorit të provincës. Ndërkohë që edhe pas marrjes nën kontroll të vendit, Fronti i Rezistencës Kombëtare (NRF) dhe forcat anti-talebane në Panjshir, u zotuan të vazhdojnë luftimet. NRF tha se ishte e pranishme në pozicione strategjike përtej luginës, duke shtuar se lufta kundër talebanëve dhe partnerëve të tyre do të vazhdojë.
Më herët të hënën, NRF pranoi se kishte pësuar humbje të konsiderueshme në fushën e betejës dhe bëri thirrje për një armëpushim. Ata propozuan në një deklaratë që talebanët të ndalojnë operacionet ushtarake në Panjshir, dhe të tërheqin forcat e tyre.
“Në këmbim, ne do t’i drejtojmë forcat tona që të përmbahen nga veprimet ushtarake,” thuhej në deklaratë.
Provinca Panjshir është e famshme pasi është vendi i rezistencës ndaj forcave sovjetike në vitet 1980 dhe talebanëve në fund të viteve ’90. Talebanët kanë marrë kontrollin e plotë të Afganistanit, duke shkaktuar shumë trazira e duke bërë që shumica e afganëve të largohen nga vendi i tyre e të strehohen në Perëndim, përfshirë këtu edhe Shqipërinë.
