Futbollisti shqiptar i përfaqësueses së moshave të Republikës së Irlandës, Roko Vata vazhdon të jetë një nga talentet më premtues të Celticut në Skoci.
17-vjeçari, i biri i një prej lojtarëve më të dalluar të Shqipërisë, Rudi Vata është stërvitur në pjesën më të madhe të sezonit me skuadrën e parë, teksa është një nga pikat kyçe të ekipit B.
Në ndeshjen e fundit që ishte titullar, Vata shënoi dy herë, por fatkeqësisht doli nga fusha e lojës i dëmtuar dhe duket do t’i duhet pak kohë për t’u rikuperuar.
Gjithsesi, kapiteni i “katolikëve”, Callum McGreggor, nuk i ka kursyer elozhet për Rokon sidomos për formën e mirë që adoleshenti po tregon.
“Ai po tregon mjaft mirë me akademinë. Ka shënuar disa gola për skuadrën B, e cila është gjë e madhe. Kjo është ajo që duam dhe ne, të mbështesim sa më shumë produkte të akademisë, t’i afrojmë në skuadrën e parë dhe t’i ndihmojmë që të arrijnë nivelin për të qenë pjesë e ekipit”, ishin fjalët e para të Callum.
Më pas ai shtoi: “Roko ka qenë rreth skuadrës që nga faza përgatitore dhe po bën një punë mjaft të mirë. Shpresoj që të rikuperohet sa më shpejtë nga dëmtimi. Është e mrekullueshme të shikosh djemtë e rinj që vijnë dhe punojnë fort për të arritur ekipin e parë. Nëse arrijmë të marrim sa më shumë prodhime akademie që është e mundur, atëherë besoj se do të jetë një mundësi e mirë për klubin që të hedhë hapa para”.
Discussion about this post