Udhëheqësit talibanë kanë marrë një tjetër vendim të pazakontë. Këtë herë qeveria talebane ka vendosur që kanalet televizive të mos transmetojnë drama me aktore gra dhe kanë theksuar se vajzat dhe gratë gazetare duhet të vendosin hixhabin.
Qeveria talebane vendosi gjithashtu ndalimin e transmetimit transmetimit të filmave, komedive apo programeve argëtuese që sipas tyre, “fyejnë” individët apo janë kundër kulturës afgane dhe mënyrës si interpretojnë talibanët Ligjin islamik.
Udhëzimet e reja, të bëra publike më 21 nëntor nga Ministria për Promovim të Virytit dhe Parandalim të Vesit, përbëjnë kufizimet e fundit nën talibanët.
Secili film apo program që transmeton Profetin Muhamed, apo figura tjera të nderuara, nuk do të mund të transmetohet, ashtu sikurse prezantimi i burrave që nuk janë të veshur sipas standardeve të grupit.
Këto vendime janë cilësuar si parime të thjeshta dhe jo kufizim i lirisë së shprehjes, nga zëdhënësi i Ministrisë gjatë një interviste.
Pas rrëzimit të Qeverisë së njohur ndërkombëtarisht në Kabul, në mes të muajit gusht, talibanët kanë thënë se do të kenë qasje më ndryshe, në krahasim me regjimin brutal të periudhës 1996-2001.
Atëbotë, vajzave nuk është mundësuar shkollimi, puna, sportet dhe aktivitete tjera.
Prej rikthimit në pushtet, talibanët kanë prezantuar rregulla rreth asaj se çfarë të veshin gratë në universitet, ua kanë ndaluar vajzave shkollimin e mesëm dhe kanë vënë ndalesa për gratë që punojnë në sektorin civil.
Qeveria e talibanëve nuk është njohur nga asnjë shtet. Shtetet e Bashkuara dhe shumë shtete tjera kanë thënë se njohja e saj varet nga respektimi i të drejtave të njeriut, liria e mediave dhe sistemi politik gjithëpërfshirës.
Discussion about this post