Tani na duhet një kryeministër me inteligjencë artificiale me emrin Topo Xhixho

Ky që kemi përballë nuk është një program qeverisës. Është një skenar propagande. Një përmbledhje gënjeshtrash të përsëritura, të zbukuruara me fjalë deri në humbje kuptimi.

Keni sfiduar edhe monologjet e Sanço Panços!

“Ibret-programi” është pasqyra e një pushteti personal, i cili si dje, si sot, për 12 vjet rresht, mban emrin Edi Rama, dhe prej kohësh nuk qeveris më për qytetarët, por për pushtetin vetë.

Në Shqipëri nuk ka as qeverisës që qeverisin, as qytetarë që qeverisen, por një grup të vogël njerëzish që sundojnë, përfitojnë e fitojnë dhe pjesa tjetër e popullsisë që grabitet e varfërohet çdo ditë, çdo javë, çdo muaj, çdo vit, çdo stinë qeverisëse.

Shqipëria zvogëlohet, ata shëndoshen! Ata tallen! Ata zgerdhihen!

Rrallëherë ndeshen në kohët moderne një rast si Shqipëria, ku tirania e shumicës artificiale ka dënuar me varfëri dhe degdis nga vendi pjesët më vitale të popullsisë.

Shqiptarët, sidomos të rinjtë, ikin çdo ditë.

Vendi zbrazet, drita fiket, dera mbyllet.

Farsa e 11 majit ishte një ditë e rëndë!

Vota u mor peng. Shqiptarëve iu mohua zgjedhja.

Synohet një vend pa Opozitë.

Ky “derdimen-program” i qeverisë është produkt i kësaj farse. Një plan për të zgjatur pushtetin dhe shkurtuar shpresat e qytetarëve, për të ruajtur privilegjet, një kurs përplasje me shoqërinë!

Ju pretendoni se Shqipëria është para dyerve të Europës, por në realitet dyert e Shqipërisë janë shpërthyer nga krimi, bandat dhe koncesionet.

Jo për qytetarët, jo për drejtësinë.

Në vend të kapitujve të BE-së, ju po hapni kapituj të rinj plagosjeje për këtë popull.

Fjalët tuaja trukokalle për zhvillim, përqeshen nga qytetarët dhe realiteti në çdo qytet, në çdo fshat, në çdo shtëpi shqiptare.Ju qofshi që nuk i trembeni ditës së gjykimit dhe bëni sikur nuk e kuptoni që po talleni me Shqipërinë, po kaq me shqiptarët.

Po arsimi?

Ka katandisje më të madhe se braktisja e arsimit?

Shkollat bosh. Universitetet pa studentë.

Financimi më i ulët në rajon. Nxënësit mësojnë në kushte të viteve ’90. Mësuesit ikin. Librat mungojnë. Laboratorët nuk ekzistojnë.

E çfarë duhet dija dhe shkolla, kur CV-në e deputetëve e përcaktojnë banditët?

Kot u mundove të vesh një ministre tejet të konsumuar, që ndërron vetëm karrige teksa vitet ikin, rrethuar me akuza të panumërta – mund të vijë aty Zoicen artificiale!

Në këtë krizë totale, çfarë bën qeveria?

Hap një ministri për inteligjencën artificiale, një ekzibicionizëm teknologjik pa lidhje me realitetin, ndërkohë që shumica e shqiptarëve nuk kanë me se të njyejnë kafshatën në tavolinat e tyre të varfra.

Shkenca dhe teknologjia ecin përpara si shërbim ndaj zhvillimit dhe mirëqenies, jo si maskë për të mbuluar thelbin e pushtetit që mashtron, vjedh dhe korrupton me “inteligjencë” të vërtetë!

Ju flisni për siguri?

Po pyesni si jetohet në Shkodër?

Si lëviz një grua natën? A guxon një fëmijë të dalë vetëm? Policia e shantazhuar e fyer me Proden në krye, i cili lëviz si bimbash me shpurë e makina të shumta luksoze rrugëve – kaq i akuzuar, kaq shërbëtor! Prokuroria e heshtur. Gjykatat të tromaksura nga kërcënimet e përditshme prej qeverisë.

Ju flisni për ekonomi?

Si mbijeton një pensionist? Si mbush një rrogëtar shportën, kur çmimet janë në qiell?

Ka ndonjë indeksim real? Apo vetëm shifra imagjinare? Kur gënjen me dashje, e vërteta nuk të intereson kurrë.

Ju flisni për stabilitet?

Po sot në Shqipëri, më shtrenjtë kushton jeta e një pule sesa e një njeriu. Për një pulë bëni sikur ngrini inspektime, ndonëse salmonelën nuk e ndalni.

Por kur një qytetar vdes nga varfëria, errësira, uji i ndotur, mungesa e ilaçit, apo kërbaçi i shtetit, askush nuk lëviz.

Dhe ndërsa flisni për zhvillim, nuk keni asnjë fjalë për kulturën, pasqyrën më të qartë të një kombi.

Një vend që braktis kulturën, pret rrënjët e veta.

Në vend të Gonxhes mund të vihej Trendafili artificial!

Kulturën e vertitni sa andej-këtej nëpër godina që i quani Ministri, por teatri, kinemaja, letërsia, historia, biblioteka janë të harruara dhe dekor propagande.

Kam frikë se do të vijë dita që për të kuptuar këto fjalë, brezave do t’u duhet të hapin fjalorët!

Kultivimi i injorancës dhe dekulturimi janë qëllime në vetvete!

Të nderuar kolegë,

Partia Demokratike, edhe në opozitë, qëndron mbi themele të vërteta. Ne marrim forcë nga njerëzit, nga dhimbja e tyre, nga toka që shkelim. Nga varfëria që shohim. Nga sytë e qytetarëve. Nga halli i pjesës më të madhe të Shqipërisë dhe shqiptarëve që nuk përfaqësohen në qeveri.

Ju bëtë farsë sepse kishit frikë.

Jo nga zgjedhjet.

Jo nga rezultati.

Por nga populli, nga Partia Demokratike, nga Sali Berisha.

Dhe më në fund, dua të ndalem te Lezha ime, qyteti im që përmbytet pas çdo shiu, dhe te fshatrat e Zadrimës, Zejmenit, Torovicës, Kashnjetit, Shënkollit – që rrinë pa drita, pa ujë, pa rrugë.

Rruga tokësore me Europën, segmenti Milot–Balldren, është kthyer në ferr – për turistët, për banorët, për demokratët e socialistët.

Duhet të matësh mirë të marrësh rrugën për në veri për dasmë a për mort!

Mirdita, një bashki e qeverisur nga e djathta, për këtë arsye është harruar dhe braktisur totalisht nga qeveria.

Në Kurbin, në qytetet si Milot dhe Mamurras, nuk ka asnjë investim të rëndësishëm.

Kjo është hakmarrja ndaj një krahine të tërë, krejt rreth qarkut të Lezhës, që nuk thyhet dhe vazhdon të nxjerrë fitues Partinë Demokratike.

Shqipëria është i vetmi vend në të cilin, po nuk i fitoi zgjedhjet partia jote, mbetesh pa punë, pa shkollë, pa ujë, pa drita, pa mjek.

Dhe, siç thoshte Gjergj Fishta:

“Atdheu s’ka fuqi, kur prijësit kanë lakmi.”

Zonja e zotërinj të mazhorancës,

Duke gjykuar sjelljen tuaj qeverisëse, as që mund të bëhet fjalë që në Shqipëri të ketë standarde demokracie: ndarje pushtetesh, sundim të ligjit, kontroll të qeverisë nga opozita, pavarësi të sistemit gjyqësor, llogaridhënie të institucioneve, transparencë dhe pjesëmarrje të qytetarëve në qeverisje.

Të flasim për këto, ne na duket luks i madh, ndërsa për ju janë gjepura.

Si përfundim, duke dëgjuar këtë gjytyrym-program dhe duke gjykuar çfarë keni bërë dymbëdhjetë vitet e kaluara, ju nuk po shtroni për diskutim mandatin e katërt qeverisës, por po u jepni shqiptarëve mandatën e katërt!

Një Zot e di se si mund të rezistojë ky popull dhe ky shtet pas kësaj mandate!

Atëherë po, do na duhet një Kryeministër me inteligjencë artificiale me emrin Topo Xhixho, në një vend të shkretuar, të thyer e përgjunjur !!!