Sali Berisha, në prononcimin për mediat pas daljes nga godina e SPAK, ka denoncuar biseda të reja në aplikacionin e krimit “Sky Ecc”, ku pretendon se përmendet ministri Taulant Balla.
Berisha iu referua një bisede të Suel Çelës, i cili sipas tij, gjatë një bisede tjetër, shprehet se dosja do të kalojë nga SPAK në OFL dhe se “Tao është plotësisht i vetëdijshëm për këtë”.
Lideri demokrat tha se kjo bëhet për të shpëtuar kriminelët, ku dosjet kalohen nga SPAK tek OFL, duke i nxjerrë jashtë afateve ligjore të gjykimit.
“Tani vazhdojmë përsëri me personazhin më të inkriminuar pas Edi Ramës në Shqipëri dhe ky është Taulant Bego Yaris. Taulanti është një personazh unik. A e dini ju të nderuar gazetarë që ai është edhe hajdut xhepash në kuptimin që nuk ngurron t’u kërkojë mbushmani kartën e telefonit, hidh ca mbushje në kartën time të telefonit. Pra, ky është njeriu që përfaqëson Edi Ramën në Tiranë.
Në janar të vitit 2021, Sueli, kapoja i bandës së Elbasanit është në diskutim me pinin D787BO, e gjeni vetë ju ku është, por edhe unë do përpiqem, në lidhje me një çështje kundër tij, të nisur nga OFL. Dosja ndodhet në SPAK. Pini D787BO thotë se ‘do ta kthej dosjen nga Spaku në OFL’. E shihni pra se si bëhen pazaret dhe pastaj më thonë pse thua ti organizatë kriminale. Po çfarë është kjo apo jo? A nuk është pazar që më hiqni dosjen dhe çojani edhe njëherë policisë. Pini D787BO thotë se do ta kthejmë dosjen nga SPAK në OFL dhe shpresoj te kushtet.
E kuptoni pra se si shpëtohen kriminelët duke bërë dosjet top futbolli nga Spaku tek OFL dhe duke i nxjerrë jashtë afateve ligjore të gjykimit. Tani në fund thuhet se ‘Tao është plotësisht i vetëdijshëm për këtë’. Domethënë do ta bëj se nuk ka ku të shkojë. Pra, kjo ishte sot për Taon dhe për redaktorin”, u shpreh Berisha.
Discussion about this post