Gjatë viteve, Igli Tare është vlerësuar shumë te Lacio për fitimet e mëdha nga shitjet e lojtarëve. Ai ka zbuluar futbollistë nga kampionate të rangut të dytë që kanë dhënë performanca të shkëlqyera. Mes tyre është edhe Etrit Berisha, që drejtori sportiv i asaj kohe te Lacio e zbuloi në 2013 te Kalmar në Suedi.
Ai u transferua në Romë për vetëm 400 mijë euro. Katër vjet më vonë, Atalanta e bleu për 5.5 milionë euro. Vetë portieri shqiptar na foli për Taren dhe tema të tjera.
Etrit Berisha, Milani rinis me Igli Taren. Zgjedhja e duhur për të nisur përsëri?
Tare te Lacio ka bërë një punë shumë të mirë nga çdo aspekt. Ka shpenzuar pak, duke sjellë lojtarë të fortë dhe duke mbajtur skuadrën gjithmonë konkurruese dhe fituese. Ka fituar Kupën e Italisë, Superkupën, dhe ishte shumë pranë titullit kampion në sezonin 2019-‘20. Do të thosha se me këto rezultate ai i ka të gjitha mundësitë për të punuar te Milani dhe mendoj se do të japë një ndihmë të madhe.
Duke folur për pak shpenzim dhe shumë rezultat, ti je një shembull i tregut të tij. Na trego si shkoi atëherë?
Kisha edhe mundësi të tjera për të firmosur, si në Itali, ashtu edhe jashtë, por ai më kishte ndjekur më shumë dhe e dinte edhe për kërkesat që kisha. Më kujtohet që ishte shumë konkret dhe për mua ishte kënaqësi e madhe të shihja këtë interes, dhe nuk pata më dyshime.
Cili është forca e tij kryesore?
Forca e tij është karakteri. Është njeri që flet me të gjithë dhe të bën të ndihesh shumë i rëndësishëm. Mundohet të të ndihmojë në çdo gjë, por në të njëjtën kohë kërkon shumë. Nëse diçka nuk shkon mirë në stërvitje apo në ndeshje, ai përpiqet të zgjidhë situatën dhe të të ndihmojë të dalësh nga një moment i vështirë.
Shqipëria ka shumë tifozë të Milanit. Si u prit ky transferim?
Ne kemi qenë gjithmonë krenarë që kur ai ishte lojtar dhe më pas drejtor. Tani ka bërë edhe një hap më tej, duke shkuar te një nga skuadrat më të forta dhe më të dashura në botë, jo vetëm në Shqipëri. Jam i sigurt që do t’i shkojë mirë sepse ka shumë potencial.
Tare do të ketë shumë çështje për të zgjidhur, përfshirë edhe atë të portierit. Menja ka kontratë deri në 2026.
Nuk hyj në detaje kontraktuale, por për mua Menja mbetet një portier i madh. Më pëlqeu shumë në vitin e parë, ishte i pabesueshëm. Pastaj u ndikua nga dëmtimet dhe nuk ishte më ai që ishte më parë, por cilësitë i ka.
Pas shumë vitesh në Itali, për ty erdhi koha të kthehesh në Suedi, ku luaje para se të të zbulonte Tare?
U ktheva në Suedi kryesisht për të mos humbur një vit të plotë. Kjo eksperiencë më ka ndihmuar shumë, arritëm të fitonim edhe Kupën. Kampionati këtu është përmirësuar shumë, ka skuadra që shkojnë gjithnjë më larg në Europa League dhe Conference League. Po përmirësohet nga çdo pikëpamje, duke krahasuar me kohën kur luaja 15 vjet më parë. Jam gati për çdo sfidë, ende ëndërroj të luaj në nivele të larta.
gijotina.com/
Discussion about this post