Kryeministri i Kosovës, Albin Kurti ka pritur sot në takim ambasadorët e vendeve të QUINT-it dhe shefin e Zyrës së Bashkimit Europian në Kosovë.
Gjatë takimit, Kurti tha se vendimi për reciprocitet ndaj Serbisë, sa u përket targave të automjeteve, nuk është provokim e as diskriminim ndaj askujt, teksa shtoi se ligji është i barabartë për të gjithë.
“Vendimi i djeshëm nuk është provokim e as diskriminim ndaj askujt dhe se policia e Kosovës ka qenë dhe është profesionale, korrekte dhe efikase. Ligji është zbatuar, trajtimi i barabartë është siguruar. Prania e tyre aktuale është aty për shkak se dhjetëra protestues kanë bllokuar me makineri rrugët që shpijnë te pikat kufitare 1 dhe 31 e në afërsi të tyre. Policia ka biseduar me protestuesit dhe nuk i ka cenuar ata”.
Kurti ka deklaruar se te çështja e reciprocitetit ose kanë të drejtë të dyja shtetet, ose e kanë gabim të dyja.
“Te ky reciprocitet i targave të përkohshme për vetura ose Kosova dhe Serbia kanë të dyja të drejtë, ose e kanë të dyja gabim. Pra, ose do t’i mbajmë aso lloj targash të dyja shtetet, ose le t’i heqim ato edhe Kosova edhe Serbia”, theksoi kryeministri Kurti.
Në takim është folur edhe për vazhdimin e dialogut ndërmjet Kosovës dhe Serbisë, teksa ambasadorët dhe Kurti janë pajtuar në faktin se duhet ruajtur paqja dhe stabiliteti deri në zgjidhjen e situatës.
