Tashmë është zyrtare, titullari i Tiranës kalon në anën tjetër të kryeqytetit

Jocelin Behiratche do të vazhdojë karrierën e tij në Shqipëri, edhe pse ishte përfolur shpesh se do të transferohej në një kampionat të huaj.

Mbrojtësi, për më tepër, nuk do të largohet nga kryeqyteti, thjesht do të ndryshojë ngjyrat e fanellës.

Futbollisti i cili luajti në tre vitet e fundit te Tirana në kampionatin shqiptar, është zyrtarizuar sot si përforcimi më i ri i Dinamos.

Lojtarit i kishte mbaruar kontrata me bardheblutë dhe preferoi të mos rinovonte. Sot, ai u ka dhënë fund të gjitha dilemave për të ardhmen e tij, duke firmosur kontratën e re me blutë, me të cilët kishte arritur akordin prej kohësh.

“Jocelin Behiratche është zyrtarisht blu!

FC Dinamo njofton se Jocelin Behiratche është zyrtarisht pjesë e 18 herë kampionëve.

23-vjeçari që luan në mbrojtje vjen tek blutë pas 3 sezoneve të suksesshme me ekipin e Tiranës dhe ditën e sotme do të vihet menjëherë nën urdhrat e stafit teknik”, njoftoi Dinamo nëpërmjet rrjeteve sociale duke postuar foton e mbrojtësit me presidentin Ardian Bardhi.