Ministrja e Financave, Delina Ibrahimaj ka folur për mediat pas mbledhjes së Këshillit të Ministrave. Para Kryeministrisë, ministrja iu përgjigj interesit të gazetarëve lidhur me kontrollin Tatimor në bizneset e Agron Dukës, në kohën kur i vëllai, Armand Duka është përfshirë në debatin për kreun e FSHF.
Ministrja u justifikua që rasti në fjalë ka qenë rastësi, ndonëse askush nuk është aq naiv sa ta besojë diçka të tillë, sidomos pas ngjarjeve të ditës së fundit ku Erion Veliaj është implikuar drejtpërsëdrejti në garën për kreun e FSHF.
“Në fakt administrata funksionon në bazë të ligjeve dhe procedurave tatimore. Rasti në fjalë ka qenë rastësi në këtë moment, vjen pas një sërë denoncimesh. Administrata ka detyrimin t’i mbyllë brenda një afati 7 ditor. Janë subjekt i kontrolleve të shpeshta, për uljen e informalitetit,” u shpreh Ibrahimaj.
Akuzat kanë qenë të shumta se tatimet janë përdorur politikisht ndaj Agron Dukës në të njëjtën ditë ku po bëhej një debat mes vëllait të këtij të fundit, presidentit të FSHF, Armand Duka dhe kryebashkiakut të Erion Veliajt.
Discussion about this post