Gjykata e Malit të Zi, ka njoftuar ditën e hënë se do të hapë një proces të ri gjyqësor ndaj dy shtetasve rusë dhe 11 personave të tjerë, të akuzuar për pjesëmarrje në një përpjekje për grusht shteti kundër qeverisë pro-perëndimore në vitin 2016.
Në datën 18 tetor është caktuar që të mbahet procesi i ri dhe gjyqtari i caktuar është Zoran Radoviq.
Në aktgjykimin e shkallës së parë që u mbajt më 9 maj të vitit 2019, gjyqtari i çështjes në atë kohë vendosi që të akuzuarit i kishin kryer krimet për të cilat u dënuan. Nën akuzë ishin udhëheqësit e koalicionit politik pro-serb të Frontit Demokratik Milan Knezheviq dhe Andrija Mandiq, ish-gjenerali i xhandarmërisë serbe Bratislav Dikiç dhe dy agjentë të shërbimit të inteligjencës ruse GRU, Eduard Shishmakov dhe Vladimir Popov.
Dy shtetasit rusë u gjykuan dhe u dënuan në mungesë në Mal të Zi, njëri me 15 dhe tjetri me 12 vjet burg, ndërsa pjesa tjetër e të dyshuarve morën dënime më të vogla. Gjykata e Apelit më 5 shkurt të këtij viti i hodhi poshtë dënimet, duke vlerësuar se vendimi i vitit 2019 ishte i shoqëruar me shkelje të ligjit penal dhe se nevojitej një proces i ri gjyqësor para një paneli tjetër gjyqtarësh.
Vendimi i gjykatës vjen pas marrjes së pushtetit nga qeveria e re pro-ruse dhe pro-serbe, e cila mundi pas gati tri dekadash Partinë Demokratike e Socialiste të presidentit Milo Gjukanoviq, që konsiderohej si një administratë pro-perëndimore e shtetit të vogël të Ballkanit.
