Të gjithë personat të cilët vuajnë dënimin në burgjet e vendit tonë, por dëshirojnë të punësohen, duhet të paraqesin disa dokumente. Në mbledhjen e sotme të Këshillit të Ministrave janë përcaktuar dhe rregullat për punësimin e tyre, kushtet e punës, kohëzgjatjen dhe shpërblimin që do të përfitojnë. Ata mund të punësohen nga administrata e institucionit ku vuajnë dënimin, nga persona juridikë privat ose nëpërmjet vetëpunësimit. Një i dënuar ka të drejtë të punojë jashtë institucionit, vetëm në rast se ai ka njohuri ose aftësi teknike të veçanta dhe ruajtja ose zhvillimi i këtyre aftësive mund të kryhet vetëm nëpërmjet punësimit në një person juridik privat jashtë institucionit. Aplikanti për punë, duhet t’i paraqesë drejtorit të institucionit një sërë dokumentacionesh të nevojshme, në mënyrë që të procedohet me marrjen e punës. Për sa i përket pagës që duhet t’i ofrohet, në rast se i burgosuri punësohet nga një person juridik privat, paga nuk duhet të jetë më e ulët se ajo minimale në vend. Në rast të punësimit të të burgosurit me kohë të pjesshme, paga ose shpërblimi përcaktohet në kontratën individuale për orë pune ose sipas punës së kryer (pagë në njësi, në detyrë ose me komision), në varësi të llojit të punës, kushteve në të cilat kryhet dhe vështirësive të saj. Paga ose shpërblimi do të depozitohet në një llogari të posaçme, e cila administrohet nga vetë personi, por pas marrjes së pëlqimit nga institucioni.
