Ditën e sotme, të gjithë ata që po vuajnë dënimin në burgun e Rrogozhinë si kanë dërguar një letër ministrit të Drejtësisë, Ulsi Manja, ku i paraqesin kërkesat dhe ankesat e tyre. Përmes kësaj letre, kërkesa e tyre e parë është që t’iu jepet amnisti, pasi një pjesë e madhe e tyre kanë kryer më shumë se 2/4 e kohë së dënimit por nuk kanë apeluar vendimet e tyre për shkak të kaosit që po përjetojnë gjykatat si pasojë e vettingut. Më tej, ata shprehen se gjykatat po iu shkelin të drejtat me këto vonesa, duke qenë se nxjerrin datat e apeleve pasi kanë kryer dënimin, çka nuk iu vlen dhe nuk i ndihmon aspak ata. “Drejtuar ministrisë së Drejtësisë. Shpresojmë të na mirëkuptoni në kërkesën tonë, duke gjetur hapësirë në ligjet e Kushtetutës dhe duke ju përshkruar aktualitetin në burgjet e Shqipërisë. Ju jemi drejtuar juve për humanizëm. Shteti ynë është në luftë me korrupsionin, me kovid-19. Gjykatat janë në kaos prej 8 vitesh, gjykata e lartë është jashtë funksionit, dosjet janë shtuar, ne po na mbaron burgu me vendimet e apeleve. Na është hequr me pa të drejtë rishikimi i vendimit në këto gjykata. Nuk ja vlen pritja për kërkesa drejtuar gjykatave sepse kur dalin datat na mbaruar dënimi”, shkruajnë ata.
Sakaq, ata kanë edhe një ankesë për rregulloren e burgut, e cila që prej fillimit të pandemisë nuk i lejojnë ata të marrin pjesë në morte, dasma apo të takojnë familjarët e tyre në raste festash. Sipas të dëbuarve, kjo rregullore iu cenon atyre të drejtat, prandaj duhet rishikuar sa më parë. “Pjesa më e madhe e të dënuarve kanë bërë më shumë se 2/4 e dënimit, gjë qe na jep mundësinë neve t’ju drejtohemi ju për një amisti ose fale të dënimit, njësoj sikur po fitojmë në Gjykatë, kushtin apo shërbimin e provës. Duke ju referuar 1 viti e gjysmë pa takime, humbje të familjarëve nga Covid-19 apo nga sëmundje të tjera, mos prezenca në morte për një vit e gjysmë, rregullore e ashpër, ndërhyrje e lejeve, kufizimi i takimeve të gjata kur është e drejta jonë të bëhemi prindër dhe të krijojmë familje. Ngushtimi në rregullore për shtrime në spitalin e burgut, shtetërore ose privat dhe kjo është realiteti i dhimbsur për fatin tonë të keq. Ju drejtohemi juve si ministri e drejtësisë të mendoni me humanizëm për të dënuarit duke na ndihmuar me amisti ose falje si bashkëatdhetarë”, përfundojnë ata letrën, duke paralajmëruar se do të dalin në greve nëse fjala e tyre nuk dëgjohet.
Discussion about this post