Është shtuar numri i zërave kritikë brenda Partisë Demokratike që kërkojnë dorëheqjen e Lulzim Bashës. Deputetja demokrate, Ilda Dhori ka kërkuar që Basha të dorëhiqet nga posti i kreut të PD pas rezultatit tronditës më 6 mars, ku PD doli forcë e tretë politike.
“Mendoj se 6 marsi duhet të shërbejë si një leksion i fortë, për të parë e lexuar realitetin, dhe për të marrë vendime konkrete, radikale, secili prej nesh, me qëllimin e vetëm, atë të përbashkimit të të gjithë demokratëve, e pas kësaj të gjithë shqiptarëve, duke parë tek PD alternativën reale për vendin! Personalisht kam kërkuar publikisht, për gjithë secilin pavarësisht pozicionimit përgjatë muajve të fundit, të dalim përtej egos personale, duke filluar nga z.Basha, i cili duhet të dorëhiqet nga funksioni si kryetar i PD, bashkimin e të gjithë demokratëve dhe çuarjen e PD në një proces zgjedhor model, meritokratik, duke respektuar vullnetin e çdo demokrati të thjeshtë”, shkruan Dhori në Facebook.
Ndër të tjera, deputetja e PD shprehet se ndërkohë që demokratët luftojnë me njëri tjetrin, harruan luftën ndaj regjimit të Ramës.
“Duke luftuar me njëri tjetrin dhe karrigen e kryetarit, harruam armikun e vërtetë të shqiptarëve dhe demokracisë, këtë regjim, që po na merr frymën çdo dite në vendin tonë, duke detyruar shumëkënd ta braktisë Shqipërinë tonë, pa mundësi zgjedhjeje. Rezultatet e 6 marsit treguan qartë, se sigla e PD ka humbur vlerën dhe fuqinë e saj”, shprehet ajo.
Më herët, deputetët Agron Gjekmarkaj, Ervin Salianji dhe Ferdinad Xhaferraj kanë kërkuar zyrtarisht dorëheqjen e Bashës nga posti i kreut të PD, ndërsa është më i lartë numri i deputetëve që nuk e kanë konfirmuar zyrtarisht qëndrimin kundër.
Discussion about this post