Policia italiane ka vënë në pranga dy persona, njëri prej të cilëve shqiptar për zjarrëvënie të qëllimshme në Troina të Sicilisë.
Sipas mediave italaiane, 25-vjeçari shqiptar dhe një 80-vjeçar italian, të dy fermerë të zonës janë kapur në flagrancë nga policia duke ndezur disa vatra zjarri.
Zona e shtrirë në një zonë të mbrojtur me pyje që i përket një parku natyror ishte identifikuar si objektivi i zjarreve nga të dy personat e arrestuar. Veprimi i tyre u ndërpre nga Karabinierët, të cilët patrulluan zonën që bashkon krahinat e Enna dhe Messina.
Shqiptari pasi pa praninë e efektivëve u përpoq të arratisej por u bllokua menjëherë. Nga kërkimi i mëvonshëm disa mjete u gjetën në vend, të përbëra nga bombola të vogla që përmbanin karburant dhe ndezës të ndryshëm.
I moshuari dhe shqiptari u arrestuan dhe u dërguan në burg në dispozicion të autoritetit gjyqësor kompetent.
Në ditët e fundit karabinierët e Enna arrestuan një tjetër zjarrvënës i cili kishte vendosur flakët në territorin e Valguarnera, edhe në këtë rast në një pronësi të shtetit dhe në zonë të pyllëzuar, duke iu afruar në mënyrë të rrezikshme disa shtëpive dhe Parkut të Minierave, një nga vendet kryesore arkeologjike industriale në të gjithë Italinë Jugore, duke krijuar dëme të mëdha dhe të vazhdueshme në mjedis.
Zjarret e përhapura në rajonin e Sicilisë rrezikojnë disa banesa në qytetin e Catanias, ku dhjetëra banorë janë evakuuar dhe aeroporti ka mbylluar fluturimet. Deri më tani nuk raportohet për viktima apo të lënduar por vetëm për dëme materiale.
