Një aksident i rëndë automobilistik në Kryqëzimin e Patokut i mori jetën para pak ditësh 54-vjeçares Lule Dedaj. E motra e viktimës, ka kërkuar drejtësi për ngjarjen, ku ndër të tjera bën thirrje që autori të kapet, pasi është larguar nga vendi i aksidentit.
“I kërkoj shtetit të zbardhet kjo ngjarje. Ai person që ka shtypur motrën time të paktën të dalë të kërkojë falje. Ai nuk është interesuar fare fare, kush ishte ai person (viktima), a ka vdekur apo jo.
Unë nuk di gjë, as se ku ka ndodhur, as se si ka ndodhur. Unë motrën time e kam gjetur copë-copë”.
Nga ana tjetër, policia edhe pas verifikimit të kamerave të sigurisë së bizneseve në këtë rrugë nuk ka mundur të gjejë autorin e këtij aksidenti të rëndë.
Lule Dedaj u përplas nga një automjet të premten në mëngjes, teksa po kalonte autostradën nga njëra anë në tjetrën.
Kjo autostradë mbetet problematike nga këmbësoret, të cilët bëjnë manovra të gabuara duke u munduar të kalojnë autostradën nga njëri krah në tjetrin, ndonëse pak metra më tutje ndodhet edhe mbikalimi ku mund të lëvizin.
Discussion about this post