Sfida ndërmjet Interit dhe Juventusit është kryefjala e javës së nëntë të Serie A, por edhe e futbollit italian. I njohur ndryshe si derbi i Italisë, ky është rivaliteti më i madh ndërmjet dy skuadrave.
Zikaltërit e vendit të dytë dhe bardhezinjtë e vendit të tretë ndahen nga vetëm një pikë. Përveç synimit për të dominuar përballë rivalëve historikë, ndeshja e kësaj të diele shërben për të përcaktuar edhe se cila prej tyre do të mbajë hapin e Napolit kryesues në garën për titullin kampion.
Simone Inzaghit do t’i duhet të bëjë pa disa lojtarë të rëndësishëm. Interi nuk do të ketë në dispozicion për këtë sfidë Calhanoglu, Acerbi dhe Carlos Augusto. Në mesfushë, përkrah Barellas, kuqezi Asllani do të jetë në balotazh me Mkhitaryan dhe Frattesi.
Dilema ka edhe për mbrojtjen, nëse do të aktivizohet Pavard apo Bisseck. Në sulm, dyshja Lautaro Martinez dhe Thuram do të jenë rreziku kryesor për Juventusin. Mungesa do të kenë edhe bardhezinjtë, ku Nico Gonzalez, Koopmeiners dhe Douglas Luiz i janë shtuar të dëmtuarve afatgjatë, Bremer e Milik.
Rikthim i rëndësishëm për Massimiliano Allegrin është ai i Chiesas, me italianin që pritet të kompletojë mesfushën përkrah Fagiolit dhe Yildizit, që do të mbështesin Vlahovicin.
Derbi i Italisë ndërmjet Interit dhe Juventusit do të luhet këtë të dielë në San Siro, duke nisur prej orës 18:00.
Discussion about this post