Të hënën hapet zyrtarisht viti i ri akademik në universitetet publike dhe private të vendit. Përveç studentëve që vijojnë studimet, në auditore këtë vit do të ulen edhe maturantët që kanë fituar një degë studimi, si dhe ata që kanë shtyrë regjistrimin nga viti i kaluar.
Drejtuesi akademik Arjan Xhelaj ka dhënë detaje mbi ecurinë e regjistrimeve dhe pritshmëritë për këtë vit të ri akademik. Ai theksoi se, ndonëse çdo vit ka degë më pak të preferuara nga studentët, aktualisht nuk parashikohet mbyllja e asnjërës prej tyre.
Në kuadër të negociatave për integrimin evropian, sfidë mbetet forcimi i bashkëpunimit mes universiteteve shqiptare dhe institucioneve të njohura të arsimit të lartë në Europë.
Ndërkohë, procesi i regjistrimit për studentët e rinj vijon paralelisht me nisjen e mësimit. Bëhet fjalë për raundin e pestë të aplikimeve, i cili është ndarë në pesë faza 48-orëshe. Ky raund ka nisur më 29 shtator dhe do të përfundojë më 8 tetor. Ai u jep mundësi maturantëve të regjistrohen në degët që preferojnë më shumë apo në ato ku ende ka vende të lira.
Discussion about this post