Para pak minutash ka filluar seanca e tretë në Kuvend, e cila është parashikuar që të ketë debate mbi programin.
Seanca ka nisur pa kryeministrin Edi Rama dhe PD ka kërkuar menjëherë ndërprerjen e seancës dhe kthimin e kryeministrit në parlament për të dëgjuar opozitën. Deputeti i PD Alfred Rushaj tha opozita e respektoi detyrimin kushtetues.
“Kreu i opozitës ka të drejtë të diskutojë me ju për datën dhe zotëria duhet të jetë këtu kur flitet për programin e tij qeverisës. Propozojmë të ndërpritet seanca, kryeministri të vijë këtu dhe të nisim debatet për çfarë ai propozoi që të ndodhë në katër vitet e ardhshme. Është kushtetuese dhe logjike zonja kryeparlamentare. Propozojmë të ndërpritet seanca dhe kryeministri të dëgjojë zërin e Opozitës.
Po të ishte seancë normale do të zhvillohej nesër. Ose e gjitha që u bë është e pavlefshme, na thatë se kryeministrit duhet të rregullojë axhendën. Tani duhet të vijë në respekt të qytetarëve. Të dëgjojë çfarë mendojnë përfaqësuesit e atyre që kanë votuar” – është shprehur Rushaj.
Nga ana tjetër kreu i PD Lulzim Basha nuk ka pranuar të flasë pa ardhur kryeministri në sallë.
Pas disa debateve mes Taulant Ballës me deputët e opozitës, zyra e kryeministrit i dërgoi mesazh kryetares së Kuvendit duke u arsyetuar se Rama e kishte të pamundur të ishte prezent në sallë dhe se në orë 17:00 do ishte pranishëm. Në këto kushte, grupi parlamentar i PD u shpreh se u duhej të merrnin një vendim dhe për këtë kërkuan të ndërpritet seanca, duke kërkuar 47 minuta kohë. Kërkesa u pranua nga kryetarja Lindita Nikolla, e cila ka ndërprerë seancë për 15 minuta pushim dhe për t’u rikthyer për vazhdimin e debatit.
