“Të kam paguar për shërbimin”, debati për një apartament mes Rei Metës dhe Meshaut

Zbardhen të tjera detaje mbi ngjarjen e ndodhur në Vlorë pak ditë më parë ku Rei Meta goditi për vdekje me grushte 55-vjeçarin Armando Meshau.

Debati mes Metës dhe Meshaut ka lidhur për një pronë, për të cilën autori i ngjarjes thotë se ka pasur edhe një kontratë me viktimën.

Më konkretisht sherri mes 33-vjeçarit dhe 55-vjeçarit kishte të bënte me një apartament me sipërfaqe 60 metra katror në zonën e Rradhimës.

Referuar dosjes së publikuar në media, Rei Meta thotë se ka pasur një kontratë me Armando Meshaun që në vitin 2020, por viktima nuk po e zbatonte, çka ka sjellë edhe një konflikt të nisur 8 muaj më parë mes tyre.

Referuar dosjes së Prokurorisë, është zbardhur dhe biseda e fundit mes tyre, para se të ndodhte krimi i rëndë, mesditën e të hënës, rreth orës 11:45.

Rei Meta ka ftuar Meshaun për tu ulur për kafe, ndërkohë që ai i është përgjigjur me fjalët “ika se kam punë” dhe ka vazhduar rrugën duke u futur tek interneti ngjitur me lokalin ku ishte ulur 33-vjeçari.

Ky i fundit, sipas dëshmisë së tij, ka treguar se kishte shkuar në Vlorë për të takuar një mikun e tij dhe aty kishte takuar viktimën.

Rei Meta: Hajde pimë një kafe dhe të flasim për kontratën që kemi

Armando Meshau: Nuk kemi se çfarë flasim bashkë

Rei Meta: Kemi kontratën që kam të për marrë një pronë

Armand Meshau: Ik shiko hallin se nuk më bën gjë mua

Rei Meta: Hajde të ulemi dhe të flasim dhe të merremi me gjyqe, hajde flasim

Më pas, Meshau ka ikur në një internet kafe, ku ka vijuar sërish debatin.

Rei Meta: Të kam paguar për shërbimin, dua dokumentet

Armando Meshau: Jo me mua këto muhabete

Rei Meta: Fol pak më qetë me mua se ka dhe njerëz të tjerë përreth që nuk na njohin

Armando Meshau: Seriozisht e ke ti?

Ka qenë edhe një nga dëshmitarët në vendin e ngjarjes që ka konfirmuar se debati mes tyre ka qenë për prona.

Referuar dosjes, Meta pasi e ka qëlluar me grusht është larguar nga vendi i ngjarjes, por ishte dorëzuar në Polici, pasi kishte mësuar se Meshau kishte ndërruar jetë.

“Kam nënshkruar një kontratë sipërmarrje si komision për gjetjen e një trualli në Radhimë, ku do të ndërtonte Armando, ndërkohë që unë do të shpërblehesha me 60 m2 apartament dhe në këmbim do i jepja Armandos 7000 euro“, ka dëshmuar Meta.