Kryetari i Partisë Demokratike, Lulzim Basha, ka dalë sot në një deklaratë publike ku tregon se PD është e vendosur që të vazhdojë me ndryshimet në Kushtetutë.
Në një postim në “Facebook”, Basha shpërndan mesazhin e tij duke theksuar se ky është vetëm hapi i parë, që do të pasohet nga një paketë e plotë ndryshimesh kushtetuese që do të kufizojnë dhe garantojnë ndarjen e pushteteve për t’i hapur Shqipërisë rrugën drejt BE-së.
“Ka vetëm një pengesë që mbanë Shqipërinë në vend numëro në procesin e integrimit dhe ky është fakti që vendi ynë udhëhiqet nga një njeri dhe nga një grup njerëzish që udhëhiqen nga interesat e tyre personale, nga lakmia për t’u pasuruar dhe për ta mbajtur këtë pushtet në mënyrë të paligjshme. Dhe rruga e vetme për ta zhbërë këtë, për ta hapur portën drejtë demokracisë , për t’u kthyer tek sundimi i ligjit është largimi i këtyre pushtetarëve. Ndaj kemi hartuar këtë paketë me amendamente të ndryshme, si një paketë urgjente kushtetuese. Ndërkohë nuk kam hequr dorë nga platforma për demokraci që kam shpalosur në janar. Nga ndryshimet në Kushtetutë”, shprehet ai.
Ndër të tjera ai, u shpreh i bindur se, PD do të vazhdojë të vërë në praktike propozimet e bëra në fillim të këtij viti. Sipas Bashës, do të jenë prioritare forcimi i kompetencave për institucionet e pavarura, eliminimi i pandëshkueshmërisë dhe reduktimi i mandatave për kryeministrin. Basha tha se këto vendime PD do i marrë duke bashkëbiseduar me qytetarët, të cilët vendosin me votën e tyre.
“Nuk kam hequr dorë nga propozimet e mia, që forcojnë kontrollin dhe balancën e institucioneve, që nga bikameralizmi tek kufizimi i kryeministrit në dy mandate, tek forcimi i kompetencave të institucioneve të pavarura tek shumë hapa të tjerë, që mund dhe duhet të hidhen, por do të hidhen në bashkëpunim dhe bashkërendim me të gjithë faktorët e shoqërisë, ato që quhen forca të gjalla të shoqërisë, në një dialog, të cilit prej Kuvendit Kombëtar të 17 korrikut, e kemi shpallur dhe po e vëmë në lëvizje, me instrumentet brenda partisë, përmes platformës qytetare për demokracinë”, tha ai.
Në janar të këtij viti, Basha ka prezantuar një sërë ligjesh që sipas tij duhet të ndryshohen në Kushtetutë, sepse nga ndërhyrjet e qeverisë Kushtetuta nuk garanton barazi të plotë dhe ndëshkueshmëri për zyrtarët e korruptuar.
