Të mbijetuarit në Bullgari, 6 me djegie e me fraktura, si paraqitet gjendja e tyre

Shtatë  të mbijetuarit nga aksidenti tragjik në Sofje po marrin mjekim në spitalin e Pirogovit.

Bëhet fjalë për dy femra dhe 5 meshkuj, mes tyre një vajzë 17 vjeçare.

6 prej tyre janë me djegie dhe probleme të frymëmarrjes dhe 1 me frakturë në këmbë, lëndim që e ka marrë gjatë hedhjes.

Siç bëjnë me dije mjekët, pacientët janë në gjendje të rëndë psikologjike pasi kanë humbur të afërmit, fëmijët.

Ata u hodhën nga xhamat e autobusit, prej nga kanë marrë lëndimet. Në spital u paraqitën pas orës 3 të mëngjesit të sotëm.

Autobusi me 52 persona në bord nga Maqedonia e Veriut u shkrumbua nga flakët në autostradë për shkaqe ende të panjohura.

Aksidenti ka ndodhur në autostradën Struma pak pas orës 02.00, në afërsi të fshatit Bosnek. Autobusi me targa të Maqedonisë ka qenë duke udhëtuar në drejtim të Republikës së Maqedonisë së Veriut.

Automjeti ka hyrë në Bullgari nga Turqia. Pak pas mesnate, autobusi ndaloi në një pikë karburanti afër Sofjes dhe më pas vazhdoi rrugën. Aksidenti ka ndodhur një orë më vonë.

Në mesin e viktimave ishin 12 fëmijë. Trupat janë shkrumbuar plotësisht. Një ekip mjekësh të mjekësisë ligjore do të marrin monstra për identifikim nga ADN-ja. 

Shkaqet e aksidentit nuk dihen ende por dy janë versionet paraprake, gabim njerëzor i shoferit ose defekt teknik në mjet.