Të moshuarit: Ta provojë Rama të kalojë muajin me pensionin tonë

Qytetarët janë shprehur të pakënaqur me premtimin e kryeministrit Edi Rama për 50 mijë lekë shpërblim duke e cilësuar si lëmoshë.

Pensionistë të shumtë kanë  shprehur shqetësimet e tyre për situatën ekonomike e politike. Ata deklaruan se me pensionin që marrin nuk mund të paguajnë dot as ilaçet dhe jeta është bërë e papërballueshme.

“Është gjynah që ne pensionistët të shpërblehemi me 50 mijë lekë. Ne kemi punuar gjithë jetën dhe të na japin 50 mijë lekë. Pse kryeministri i ngre rrogat të gjithë pushtetarëve? Iu bëj thirrje pensionistëve mos të pranojnë lëmoshë. Të ngrihemi të tërë, ndoshta s’kemi mundësi për protesta, por të ulemi atje në tokë”, shprehet një e moshuar.

“Ai 50 mijë lekëshi që thotë kryeministri është lëmoshë. Unë më 50 mijë lekë nuk marr dot ilaçet. Pse nuk heq TVSH-në e dritave. Paguaj 1200 lekë për televizionin. Mos t’i marrë TVSH-në pensionistëve. Marr 70 mijë lekë pension, është turp dhe faqe e zezë. Ai po tallet me pensionistët. Ua ngre qeveritarëve rrogën, pse nuk ua ngre pensionistëve”, thekson një pensioniste tjetër.

Ndërsa një pensionist u ofrua t’i jepte pensionin kryeministrit Edi Rama për të kaluar muajin.

“Pensionistët gënjehen me thërrime. 50 mijë lekë 10 kokrra vezë janë. Kemi punuar në kooperativë, duhet një ditë të shpjegoj se çfarë ishte kooperativa.

Shqetësim i madh është, do t’i jap unë Edi Ramës pensionin tim e të shikoj se si do t’ia dalë gjithë muajin. Unë t’i jap pensionin e gjithë vitit, ndërsa ai të më japë rrogën e një muaji.

Ne pensionistët jemi bërë si ata qentë e rrugës. Pensioni im është 120 mijë lekë, a dalin? Me çfarë t’i blej ilaçet”, thanë ata.