Skandali i publikimit të pagave të mbi 630 mijë punonjësve shqiptarëve ka qenë kryefjalë e ditëve të fundit. Së fundmi, për këtë listë ka reaguar dhe Komuniteti Shqiptar në Greqi duke thënë se disa muaj para zgjedhjeve të 25 prillit, i kërkuan të deklaronin vendbanimet përmes e-albania për të votuar.
“Pak muaj para zgjedhjeve qeveria shqiptare na kërkoi të gjithë emigrantëve, të deklaronim vullnetarisht vendbanimet tona në shtetet ku jetojmë nëpërmjet platformës e-Albania. Kjo me justifikimin se ishte e domosdoshme për të votuar nga vendet ku jetojmë. Kjo e drejtë nuk na u garantua kurrë. Sigurisht që shumë prej nesh, duke jetuar në perëndim, ishim shumë skeptikë”, shkruhet në deklaratë.
Sipas tyre, fakti që vetëm disa emigrantë po deklaronin të dhënat, u kërcënuan me sanksione për mos ofrim shërbimesh online, shërbime që i cilësojnë jetike për shkak të largësisë nga atdheu dhe pamundësisë për t’i pasur në kohën e duhur. Pas kësaj përmend faktin e publikimit të të dhënave dhe i kërkon Ramës që të kërkojë falje për presionin që ushtroi së bashku me qeverinë.
“Ndërkohë, pasi u pa që vetëm një pjesë shumë e vogël emigrantësh po deklaronin të dhënat, nga ana e qeverisë u kërcënuam me sanksione për mos ofrim shërbimesh online, shërbime këto që janë jetike për ne për shkak të largësisë nga atdheu dhe pamundësisë për t’i pasur ato në kohën e duhur. Si për ironi të fatit, pa kaluar viti dashje pa dashje u vërtetua skepticizmi ynë kur këto ditë ka plasur dhe skandali i rrjedhjes së të dhënave personale dhe ekonomike të më shumë se 650 mijë shtetasve që jetojnë në Shqipëri. Sot, Kryeministri shqiptar u kërkoi falje shqiptarëve të prekur nga paaftësia e qeverisë që ai vet drejton. Duke qenë plotësisht në të drejtën tonë dhe ne i kërkojmë sot Kryeministrit, të na kërkojë falje për presionin që ushtroi ai dhe qeveria e tij ndaj nesh për një çështje që sot rezultoi që ishte abuzim mbi të drejtat tona si shtetas shqiptarë që jetojmë jashtë Shqipërisë dhe se shteti amë është i paaftë të na garantojë sigurinë mbi të dhënat tona personale”, përfundon reagimi i Komunitetit Shqiptar në Greqi.
Discussion about this post