Hekuran Marku dhe Paul (Agustin) Deda janë dy shoqëruesit e ish-ministrit Saimir Tahiri të cilët janë arrestuar gjatë ditës së sotme.
Dy shoqëruesit e ish-ministrit të Brendshëm, ndaj të cilëve SPAK, kishte ngritur akuzën e kultivimit dhe shitjes së lëndëve narkotike në kuadër të grupit të strukturuar kriminal, ishin shpallur në kërkim ndërkombëtar.
Arrestimi i tyre erdhi si pasojë e përgjimeve që dolën nga operacioni “Shpirti”, ku u zbulua se ishin të përfshirë në kultivimin dhe trafikimin e tonelatave drogë nga Shqipëria drejt Italisë.
Sipas SPAK, Marku e Deda në bashkëpunim me Eltjon Bregun dhe italianët Silvio Sidella, Raffaele Addante, Guisepe Vispo, Alesio Ventrella kanë trafikuar 1016 kg lëndë narkotike nga Shqipëria drejt Italisë. Droga është kapur në Bari dhe kjo ngarkesë është bërë edhe shkaku i zbulimit të rrjetit me 80 persona, 28 prej të cilëve janë arrestuar në Shqipëri. Kanë qenë 4 të penduarit e drejtësisë Fiqiret Seferi, Ferhat Ajdini, Donial Drolli, Mariglen Shusha dhe Elton Hamza, që kanë treguar rrjetin e trafikut të drogës, mes tyre edhe prokurori Maksim Sota.
Hekuran Marku u arrestua në Gjermani, ndërsa Paul Deda alias Agustin Deda u arrestua në Francë. Prokuroria Posaçme ka dërguar gjithë dokumentacionin e nevojshëm për ekstradimin e tyre në Shqipëri.
