Një sasi prej 61 900 euro janë sekuestruar nga policia në Morinë.
Paratë, sipas bluve, i kishte me vete një 32-vjeçar me banim në Itali, i cili nuk i deklaroi në pikën kufitare.
Ky i fundit është proceduar penalisht.
“Shërbimet e Policisë Kufitare në Morinë, në vijim të punës për goditjen e paligjshmërive në kufi, bazuar në analizën e riskut dhe në kontrollet me përzgjedhje, në hyrje të RSH-së, kanë kaluar në vijën e dytë, për kontroll më të imtësishëm, automjetin tip ‘Volkswagen’. Gjatë kontrollit fizik ndaj pasagjerit të këtij automjeti, shtetasit Q.L., shërbimet e Policisë gjetën dhe sekuestruan 61 900 euro, të cilat ai nuk i kishte deklaruar, sipas përcaktimeve ligjore në fuqi”, njoftoi policia.
“Në përfundim të veprimeve hetimore, specialistët e Seksionit për Hetimin e Krimeve Ekonomike e Financiare të DVP Kukës referuan materialet në Prokurori dhe nisi procedimi në gjendje të lirë për shtetasin Q. L., 32 vjeç, banues në Itali, për veprën penale ‘Mosdeklarimi në kufi i të hollave dhe i sendeve me vlerë’”, shtuan të njëjtat burime.
Discussion about this post