Një person mbeti i plagosur me armë zjarri këtë të hënë, në zonën e njohur si Komuna e Parisit.
I plagosuri është identifikuar si Lorenc Kosta, 45 vjeç. Ndërsa autori i dyshuar është identifikuar si Erjon Goxhara, punonjës policisë në strukturat për Migracionin në Tiranë.
Policia njoftoi zyrtarisht se ngjarja ka ndodhur “për motive të dobëta”, ndërsa burime nga uniformat blu thanë se ka dyshime që 45-vjeçari i ka ngacmuar partneren efektivit.
“Rreth orës 14:07, në afërsi të një marketi te rrethrrotullimi i Komunës së Parisit, dyshohet se për motive të dobëta, shtetasi E. G., (punonjës Policie) ka plagosur me armë zjarri shtetasin L. K., 45 vjeç, i cili ndodhet në spital, në kujdesin e mjekëve. Grupi hetimor ndodhet në vendngjarje dhe nën drejtimin e Prokurorisë po punon për kapjen e autorit të dyshuar dhe sqarimin e rrethanave të ngjarjes”, njoftoi shkurtimisht policia.
Pas plagosjes, dyshohet se efektivi u largua nga vendngjarja me një automjet tip “Chevrolet”, ngjyrë të kuqe.
Plagosja ndodhi në një zonë mjaft të populluar dhe të mbikëqyrur nga kamera sigurie të bizneseve, këqyrja e pamjeve të të cilave nga grupi hetimor pritet të hedhë më shumë dritë rreth dinamikës së ngjarjes.
Nga vendi i ngjarjes, kreu i Policisë së Tiranës, Tonin Vocaj tha detaje nga hetimet paraprake, në një prononcim për gazetarët.
“Autori i ka qëlluar në pjesën e poshtë të trupit që gjë tregon se se nuk pasur një dashje për ta vrarë”, megjithatë, shtoi se hetimet e mëtejshme do të thonë fjalën e fundit. Lidhur me gjendjen e të plagosurit, tha se mjekët kanë konfirmuar se nuk është në rrezik për jetën.
Vocaj u shpreh se kur kreu plagosjen, efektivi nuk ishte në detyrë. Ai i bëri thirrje autorit të dorëzohet, ndërsa zbuloi se më herët kishte pasur edhe një komunikim me të. “Kam komunikuar me efektivin, është në gjendje të rënduar psikologjike, po e kontaktojmë që mos të kryejë ndonjë veprim tjetër ndaj vetes. Jemi duke shpenzuar energjitë ta kapim. I bëjmë thirrje dhe nëpërmjet medias që të dorëzohet”, tha ai.
Discussion about this post