Të shtëna me armë zjarri janë shënuar në Kurbin këtë të mërkurë. Nuk raportohet për persona të lënduar, ndërsa sipas një rindërtimit paraprak të ngjarjes nga autoritetet, dyshohet se një 33-vjeçar ka qëlluar drejt një lokali.
Sipas policisë, ngjarja ka ndodhur “për motive të dobëta”, ndërsa autori është në arrati.
“Rreth orës 11:00, shtetasi Gentjan Markaj, 33 vjeç, dyshohet se për motive të dobëta, ka qëlluar me armë zjarri në drejtim të lokalit në pronësi të shtetasit Fatjon Stakaj. Nuk ka asnjë shtetas të dëmtuar, vetëm dëme materiale. Shërbimet e Policisë kanë shkuar menjëherë në vendngjarje, bashkë me grupin hetimor”, njoftoi policia.
“Autori i dyshuar, shtetasi Gentjan Markaj, sapo ka parë shërbimet e Policisë, është larguar mes parcelave të mbjella me misër, në drejtim të fshatit Gorre, duke marrë dhe armën e zjarrit me vete. Shërbimet e Policisë janë vënë në ndjekje të tij dhe në ndihmë janë nisur menjëherë Forcat Speciale Renea dhe Njësia Kombëtare e Sigurisë. Grupi hetimor, në drejtimin e Prokurorisë, vijon hetimet për sqarimin e rrethanave dhe sekuestrimin e provave, me qëllim dokumentimin e plotë ligjor të këtij rasti”, shtuan të njëjtat burime.
Discussion about this post