Të shtëna në Vaun e Dejës, qëllohet drejt një makine

Të shtëna me armë zjarri janë raportuar mëngjesin e kësaj të enjteje në Vaun e Dejës. Nga ngjarja nuk ka persona të lënduar.

Ka qenë 39-vjeçari Gjik Neka, i cili ka denoncuar në polici se drejt makinës së tij është qëlluar me armë. Blutë kanë identifikuar autorin e dyshuar, i cili është shpallur në kërkim.

“Rreth orës 08:00, shtetasi Gj.N. (Gjik Neka), 39 vjeç, banues në Koman, ka njoftuar Policinë se një shtetas i paidentifikuar, dyshohet se kishte qëlluar me armë zjarri pistoletë, në drejtim të automjetit të tij, pa shkaktuar dëmtime në njerëz. Shërbimet e Policisë shkuan menjëherë në vendngjarje dhe bënë të mundur identifikimin e autorit të dyshuar shtetasin V.K., rreth 35 vjeç dhe vijon kontrolli i zonës për kapjen e tij”, thuhet në njoftimin e bluve.

Grupi hetimor, në drejtimin e Prokurorisë, po punon për zbardhjen e rrethanave dhe dokumentimin ligjor të rastit, shtuan të njëjtat burime.