Të shtënat me armë në Dibër/ Shpallet në kërkim polici, babai i kandidatit të PS

Janë zbardhur detaje të reja nga ngjarja e regjistruar mbrëmjen e sotme në fshatin Pilafe të Peshkopisë, ku një efektiv policie qëlloi me armë zjarri në ajër.

Bëhet fjalë për efektivin Esat Gjura, i cili është shpallur në kërkim. Mësohet se Esat Gjura është babai i kandidatit të PS-së për Qarkun e Dibrës, Danjel Gjura.

Gjithashtu, mësohet se në kërkim është shpallur edhe një person tjetër, identiteti i të cilit ende nuk dihet. Dyshohet se të shtënat me armë kanë ardhur pas një konflikt për çështjen e zgjedhjeve. Demokratët akuzojnjë socialistjët pjër blerje votash.

Policia e Dibrës ka dalë me një komunikatë të shkurtër për mediat në lidhje me përplasjen e regjistruar mbrëmjen e sotme në fshatin Pilafe, të njësisë administrative Tomin.

Ngjarja

Një grup simpatizantësh të PD-së bashkë me dy kandidatët Xhemal Gjunkshi dhe Xhelal Mziu kanë bllokuar një automjet, duke pretenduar se brenda ndodheshin persona që do të shpërndanin para dhe tollona nafte në zonat e thella të Dibrës në këmbim të votave për PS-në.

Blutë e Dibrës thonë se kanë ngritur një grup të posaçëm me SPAK-un për të hetuar rastin, teksa thonë se Xhemal Gjunkshi pretendon se një prej personave kur ka ikur ka qëlluar me armë zjarri në ajër.

Pra, personat e dyshuar për blerje votash kanë mundur të arratisen, teksa burime bëjnë me dije se personi i cili ka qëlluar me armë zjarri në ajër është efektifvi i Policisë, Esat Gjura, i cili  është babai i kandidatit të PS-së për Qarkun e Dibrës, Danjel Gjura. Mësohet se konflikti mes dy grupimeve ka degraduar deri në përplasje fizike.

Edhe pse Policia nuk i përmend as inicialet, burime bëjnë me dije se Esat Gjura së bashku me një person tjetër janë shpallur në kërkim nga Policia, teksa makina është sekuestruar për verifikim dhe kontroll.

“Rreth orës 20.25 shtetasi Xh.Gj., (kanditat për deputet i subjektit politik Partia Demokratike), ka telefonuar në sallën operative të Drejtorisë Vendore të Policisë Dibër, i cili pretendonte se në fshatin Pilafe, njësia Administrative Tomin, kanë ndaluar një shtetas që dyshohej se shpërndante para në këmbim të votave. Gjithashtu shtetasi Xh.Gj., paraprakisht ka pretenduar se një person teksa është larguar ka qëlluar njëherë me armë zjarri në ajër. Menjëherë është ngritur grupi hetimor i Drejtorisë Vendore të Policisë Dibër dhe nën drejtimin e SPAK dhe të Prokurorisë të Juridiksionit të Përgjithshëm Dibër po kryejnë hetimet për zbardhjen e rastit”, njoftoi policia.