Një ngjarje e rëndë tronditi pasditen e sotme zonën e Don Boskos në Tiranë. Rreth orës 16:15, në ambientet e një lokali, është qëlluar me breshëri kallashnikovi nga jashtë lokalit në drejtim të një tavoline ku ishin ulur pesë persona.
Si pasojë e të shtënave mbeti i vrarë Erion Çela, 35 vjeç. Viktima nuk i rezistoi plagëve të marra dhe ka ndërruar jetë në spital. Ndërsa u plagosën katër të tjerë, Arben Dani, 46 vjeç, vëllai i viktimës, Blerim Çela 28 vjeç, Edmond Crroj, 41 vjeç dhe kamarieri i lokalit, Azbi Selimaj, 19 vjeç.
Ndërkohë gjatë atentatit ka pasur edhe persona të tjerë në lokal, të cilat janë tronditur nga ngjarja. Sipas dëshmitarëve, njëri prej autorëve ka dalë nga makina tip “Mercedes Benz” dhe në këmbë është drejtuar në afërsi të tavolinës ku ndodhej viktima dhe të plagosurit e më pas ka lëshuar mbi to një breshëri kallashnikovi. Më pas, ai ka hipur sërish në makinë dhe me ndihmën e një personi tjetër është larguar me shpejtësi nga vendngjarja, në drejtim të Laprakës.
Në vendin e ngjarjes ka mbërritur menjëherë policia e cila ka sekuestruar kamerat e sigurisë dhe ka ngritur pika kontrolli në të gjitha hyrje-daljet e Tiranës, si dhe në brendësi të lagjeve ku dyshohet se janë larguar autorët.
Discussion about this post