PD ka reaguar sërish për skandalin e inceneratorëve, duke treguar më në detaje, sipas tyre, përfshirjen e zv.kryeministrit Arben Ahmetaj në inceneratorin e Elbasanit, të cilin e akuzojnë se ka dhënë pa garë koncensionin në fjalë.
Përmes një postimi në Facebook, PD shkruan se përpjekjet e disa personave për të sulmuar komisionin hetimor kanë për qëllim mbrojtjen e individëve të korruptuar në këmbim të mbështetjes financiare.
“Përpjekjet e “non gratave” të shpallura dhe të pashpallura për të sulmuar komisionin kanë për qëllim mbrojtjen e individëve të korruptuar në këmbim të mbështetjes financiare dhe elektorale. Aleanca e të korruptuarve nuk do ta ndal PD-në t’i shkojë deri në fund zbardhjes së kësaj afere. Çdo ditë është dhe më e qartë se si janë përfshirë ministra e funksionarë të lartë në shkelje të çdo ligji. Një ndër ta është Arben Ahmetaj. Koncesioni i inceneratorit të Elbasanit i është dhënë “Albtek Energy” me “negocim pa shpallje”, procedurë që ligji nuk e parashikon. Arben Ahmetaj ka dhënë miratimin për t’i dhënë koncesionin kompanisë “Albtek Energy” me një procedurë që është në kundërshtim me ligjin. Të tre inceneratorët nuk kanë pasur leje mjedisore. Koncensoni iu dha një kompanie që nuk ka asnjë ditë eksperiencë në fushën e incenerimit”, shkruan PD.
Sipas selisë blu, 430 milionë euro kanë shkuar në xhepat e pushtetarëve të lidhur me Klodian Zoton, Mirel Mertirin, Stela Gugallën, ndërsa akuzojnë funksionarë të lartë të qeverisë si të përfshirë.
Discussion about this post