Pas përfundimit të fjalës në Kuvend, nënkryetari i LSI, Petrit Vasili kritikoi sërish qeverinë për menaxhimin e pandemisë.
Vasili tha para gazetarëve se Rama është “kapur për fyti” nga oligarkët dhe duhet të largohet sa më shpejt nëse nuk është në gjendje të japë zgjidhje për krizën në Shqipëri.
“Janë mbi 1 milionë e 700 mijë qytetarë që i kanë zgjidhur vetë problemet e tyre dhe përballen vetë sot me pandeminë. Në vend se të kishte kokën e ulur me turp, sot vjen e bën propagandë. Është tragjike që jemi në këtë situatë. Nëse ekziston një element pozitiv është përkushtimi i mjekëve. Rreth 2 milionë shqiptarë kanë mbetur të braktisur nga qeveria e tyre. Kryeministri Edi Rama është kapur për fyti nga oligarkët, shpik këtë krizë. Sa kohë paguan koncesionet dhe oligarkët, është armik i qytetarëve. LSI ka vetëm një plan, të thotë të vërtetat e saj. Kryeministri duhet të largohet një sahat e më parë nëse nuk gjen zgjidhje”, tha Vasili.
Vasili e konsideroi si propagandë përballimin e pandemisë nga qeveria duke thënë se mijëra familje të infektuara janë të pambështetur.
“Sot në Kuvend u diskutua një marrëveshje që lidhet me një dërgesë vaksinash të tjera, por të gjithë në sallë harrojnë se qindra mijëra qytetarë janë sot me Covid dhe mijëra familjarë të pambështetur. Propagandë e shëmtuar nga qeveria. 175 mijë të infektuar në regjistrat e qeverisë, por nga vetë shifrat e qeverisë janë të infektuar 10-fishi, rreth 10 milionë shqiptarë”, tha Vasili.
I pyetur për krizën energjetike dhe qëndrimin e LSI-së, ai theksoi se ka vetëm një plan për të qenë me qytetarët dhe t’i bjerë me çekiç kokës atij që ka përgjegjësinë për t’i zgjidhur.
