Koreografi Albi Nako është sulmuar sërish nga qytetarët pas pyetjes bullizuese që i bëri një vajze të vogël në formatin “Të ka mami yll”, në të cilin marrin pjesë fëmijë nga mosha 10-15 vjeç.
Pjesë e formatit është pikërisht edhe Albi Nako ku bën pjesë në jurinë që vlerëson fëmijët. Ai ka ironizuar një prej vogëlusheve për shëndetin e tepërt duke bëtë komente bullizuese.
“Ty të pëlqen më shumë të ushqehesh apo të kërcesh?”- e pyet Albi Nako vajzën
“Të kërcej”- i përgjigjet ajo.
Ndërkohë anëtarja tjetër e jurisë, Erjona Rusi, e pyet nëse do të ndalonte së ushqyeri për të kërcyer, duke e vendosur vajzën në një pozitë mjaft të pakëndshme.
Më pas Albi Nako insiston duke e pyetur vajzën se cili nga djemtë krah saj e ka trupin më të bukur për balet. Ky ishte një moment si sikletshëm për vajzën, e cila u zu ngushtë dhe nuk u ndje mirë për shkak të trupit të saj.
Kjo më pas ka sjellë edhe një lumë komentesh në rrjetet sociale, ku shumë njerëz kanë komentuar rreth këtij bullizimi, duke kërkuar heqjen e tij nga ekrani, pasi kjo nuk është hera e parë që ndodh.
“Skandaloze! Si shpaloset injoranca pa pikë turpi në tv”
“Nuk është hera e parë që Albi bullizon, nuk e di përse i mbajnë këto figura në ekran”
“Se di dmth sot mundohemi me çdo kusht të informojmë fëmijët për të drejtat e tyre, për respekt reciprok, për shëndet mendor e fizik që në mosh të vogël dhe vjen ky zotria dhe bën një pyetje të tillë skandaloze se di ca do bëja nëse do i drejtohej fëmijës time…duhet dikush ti heqi sa më parë nga mediat e mbase ti zhduki dhe nga shoqëria”- janë disa prej komenteve në rrjetet sociale.
Kjo nuk është hera e parë që Albi Nako është kategorizuar nga ndjekësit si bullizues. Një rast i mëparshëm ka qenë edhe me Belën, e cila kërkoi një vend në “Just Dance”, por u ofendua nga Nako i cili e pyeti për moshën, duke shtuar me ironi se më mirë të zgjidhte t’i dedikohej familjes dhe jo kërcimit.
