Vendimi ishte në ajër, por në prag të ditës së fundit të Ligue 1 u zyrtarizua: Igor Tudor nuk do të jetë më trajner i Marsejës.
Sipas l’Equipe, trajneri kroat tashmë ua kishte komunikuar largimin lojtarëve para stërvitjes të enjten dhe gjatë një konference për shtyp dy ditë pas ndeshjes kundër Ajaccio, konfirmimi erdhi nga personi në fjalë dhe nga presidenti i klubit, Pablo Longoria:
“Ne kemi respektuar vullnetin e Igor Tudor për të mos vazhduar aventurën me ne. Personalisht dhe si përfaqësues i klubit, e falënderoj për punën e bërë, dhe vlerat që solli, standardet e larta, rigorozitetin dhe ambicien për të dhënë më të mirën”.
Vetë Tudor foli pas Longorias: “Do të doja të falënderoja presidentin për fjalët e tij. Ka qenë një nder për mua të punoj këtë sezon me klubin, të jem pjesë e kësaj familjeje, të takoj tifozët dhe këtë qytet me një energji speciale.
Largohem për arsye personale dhe profesionale, nuk kam marrëveshje me një klub tjeter. Të punosh për OM për një vit është si të punosh dy tre vjet në një klub tjetër. Jam i qetë, kam pak kohë që e mendoj. Detajet nuk kanë rëndësi, rëndësi ka ajo që ndjej brenda”.
Aventura e tij në Francë përfundon kështu pas vetëm një sezoni, në të cilin ai përsëri përfundoi i treti dhe u kualifikua në paraeliminatore të Ligës së Kampionëve.
Tudor flitet se mund të jetë pasardhës i Max Allegrit te pankina e Juventusit. Pas këtij sezoni katastrofik, “Zonja e Vjetër”, mund të largojë teknikun livornez, për të marrë një personazh që botën e Juves e njeh shumë mirë.
Discussion about this post