Këshilltari për Çështjet Ekonomike në PD dhe njëkohësisht nënKryetar i Këshillit Bashkiak Tiranë, Dorjan Teliti, i bën thirrje qytetarëve dhe familjeve të kryeqytetit që trajtohen me ndihmë ekonomike në nivele tërësisht skandaloze të protestojnë kundër vjedhjeve dhe abuzimeve, ditën e premte në orën 11.00 para Bashkisë Tiranë.
Teliti shprehet se 2.2 milionë euro në vit jepen për ndihmën ekonomike në Tiranë, ndërsa 30 milionë euro janë marrë përmes procedurave tenderuese nga firma “5D” – aferë kjo që çoi pas hekurave drejtorët e Veliajt.
Postimi
Në një postim në FB, ai shkruan:
2.2 milionë euro/vit për ndihmën ekonomike në Tiranë vs 30 milionë euro-t e 5D-ve strategjike. 5D gllabëron sa 9 vite fonde të ndihmës ekonomike në Kryeqytet.
Ironike duken pamjet e Kryebashkiakut të Tiranës kur e shikon që vesh një përparëse, merr garuzhden e mjerimit dhe mbush pjatat me ushqim për të varfërit e Tiranës nën fluksin e fotografëve dhe kameramanëve të kudogjendur.
Ironike kur shikon që Kryebashkiaku mundohet “të ndihmojë” të varfërit, ndërkohë që 5 drejtorët e tij nuk ndjekin hapat e “të madhit”, përkundrazi.
Ironike kur mendon që shefi “mundohet e lodhet” për të ndihmuar të varfërit, por dalin disa drejtora “të pabindur” që veprojne me mendjen e tyre dhe “tradhëtojnë” filozofinë dhe besimin e shefit të madh duke vepruar e ngrënë mbrapa kurrizit të tij.
Ama kulmi i ironisë është raporti propagandë vs realitet. Cdo vit janë rreth 2300-2400 familje që trajtohen me ndihmë ekonomike në Bashkinë e Tiranës, për të cilët buxheti alokon 2.2 milionë euro në vit për pagesat e kësaj ndihme, ndërkohë nga ana tjetër na del në skenë 5D-ja që merr fap e fap plot 30 milionë euro (gjithmonë pa dijeninë e shefit).
⁉️A ka padrejtësi më të madhe sesa të luash e të bësh politikë me garuzhden e varfërisë, ndërkohë 5D bën kërdinë?
Ndaj i bëj thirrje cdokujt që nuk ka mundësi të ushqejë fëmijët e tij, cdokujt që varfëria i ka zënë rrënjë të thella në familjen e tij, të ngrihet e të protestojë të premten ora 11.00. Tirana dhe Shqipëria janë të keqadministruar dhe të vjedhur. Të gjithë bashkë para Bashkisë Tiranë për të kërkuar dorëheqjen e Kryebashkiakut Veliaj që në njërën dorë mban garuzhden e varfërisë e në dorën tjetër stilografin e Autoritetit Kontraktor të Bashkisë Tiranë.
#OSotOKurrë
Discussion about this post