Kokaina e kapur në Tiranë në operacionin “Tempulli” rezulton e një cilësie tepër të lartë dhe kjo kjo është provë që shpërndarësit kanë lidhje të forta me trafikantët që e fusin atë në Shqipëri.
Në këtë përfundim ka arritur nga policia pas megaoperacionit antidrogë të pak ditëve më parë ku u arrestuan 91 persona dhe u sekuestruan 3.7 kg kokainë.
Shefi i seksionit të hetimit të narkotikëve në Policinë e Tiranës, Dritan Sula thotë se tani po hetohet për të kapur kokat e narkotrafikut.
“Ka pasur cilësi mbi 90%. Kjo cilësi mjaft e lartë tregon lidhjen e drejtpërdrejt të shitësave që shesin në qytetin e Tiranës, me trafikantët që e fusin në territorin e Republikës së Shqipërisë. Është edhe një hetim paralel që mund të finalizohet shumë shpejt dhe mund të na çojë te këta njerëz apo trafikantë që e fusin lëndën narkotike në Shqipëri”.
Paralelisht, hetime po zhvillohen edhe nga Policia e Durrësit, Vlorës, Korçës dhe Elbasanit.
Por Policia e Tiranës po heton edhe për një fenomen tjetër, atë të kanabisit që po hyn në vendin tonë nga Kanadaja.
“Kjo lëndë narkotike është futur në Shqipëri nëpërmjet rrugëve detare e tokësore dhe tregtohet në zona të ndryshme të qytetit të Tiranës. Kjo drogë zakonisht përdoret nga të rinjtë”.
Krahas kokainës dhe kanabisit, në kryeqytet kohët e fundit është kthyer në trend përdorimi i ekstazisë.
Kjo drogë kryesisht konsumohet në lokalet e natës dhe për policinë është kthyer në shqetësim për shkak të konsumimit të saj nga moshat e reja. /Tv Klan/
Discussion about this post