Eliminimi i konkurrencës në tenderët publik, është kthyer në një metodë të zakonshme për bashkitë e vendit. Kësaj radhe është Bashkia e Durrësit e cila ka zhvilluar një procedurë ku janë eliminuar të gjithë konkurrentët përveç fituesit.
Tenderi i hapur në datën 22 nëntor 2021, ka numër reference REF-12277-11-19-2021, është për blerje materiale pastrimi dhe dezinfektimi. Kjo procedura mban fondin limit prej 14.912.400 lekë të reja, ose rreth 150 milionë lekë të vjetra. Në këtë tender kanë marrë pjesë në garë 7 kompani, “ANBIM”, “EURO MEGA 2010”, “MURATI D”, “AN&RA”, “ATLANTIK 3”, “Pastrim Silvio”, “GET klin”.
Ndërkohë 6 prej kompanive janë skualifikuar nga gara dhe, “ANBIM”, “EURO MEGA 2010”, “MURATI D”, “ATLANTIK 3”, “Pastrim Silvio”, “GET klin”, me arsye se nuk kanë plotësuar kriteret që ka kërkuar tenderi, duke lënë kështu të vetme në tender kompaninë “AN&RA”. Kështu, kompania “AN&RA” është shpallur fituese. Deri më tani kemi parë që në procedurat që janë skualifikuar konkurrentët nga gara, ka pasur deri në 3 konkurrent, ku 2 janë skualifikuar. Por në rastin e tenderit në fjalë, janë 6 kompani që skualifikohen, vetëm që fituesi të jetë kompania e cila është përzgjedhur.
Kjo procedurë është shpallur me flamur të kuq nga “Open Data” me komentin “skualifikimi i të gjithë operatorëve konkurrues përveç fituesit”. Kjo procedurë është përcaktuar me risk, që do të thotë se krijon dyshime që fituesi mund të jetë paracaktuar nga Bashkia e Durrësit, e cila drejtohet nga kryetarja e emëruar Emirjana Sako.
Gijotina.com
Discussion about this post