Një tjetër tender ku skualifikohen të gjithë konkurrentët, përveç fituesit, është zhvilluar nga Bashkia e Tiranës. Në procedurën e hapur në datën 6 dhjetor 2021, institucioni i drejtuar nga Erion Veliaj, parashikon ndërtimin e mbrojtësve nga erozioni në lumin e Tërkuzit ose siç njihet ndyshe lumi i Tiranës. Ky tender mban numrin e referencës REF-13982-12-03-2021 dhe ka fondin limit prej 20.188.435 lekëve të reje, ose rreth 202 milionë lekë të vjetra.
Në këtë tender kanë marrë pjesë 15 kompani, “Ardmir” shpk &“ASI-2A co” shpk, “Shendelli” shpk, “Pepa Group” shpk, “Kupa” shpk, “Caushi M” shpk & “K.M.K” shpk, “Liqeni VII” sha, “Ina” shpk, “Glavenica” shpk, “Shpresa-Al” shpk, “Zdravo” shpk, “Klajger Konstruksion” shpk, “BE-IS” shpk, “Denis-05” shpk, “Spektri” shpk, “Sireta 2F” shpk.
14 kompani prej tyre, janë skualifikuar dhe fituese është shpallur automatikisht kompania “Pepa Group” shpk, me ofertën prej 12,594,920 lekë të reja ose rreth 130 milionë lekë të vjetra. Ndërkohë, në procedurë arsyet e skualifikimit jepen vetëm për dy prej kompanive, ndërsa për 12 të tjera nuk tregohet se pse janë hequr nga gara.
Arsyetimi bëhet për shoqërinë “Ardmir” shpk & “ASI-2A co” shpk, ku thuhet se ka paraqitur si punë të ngjashme objekte që nuk konsiderohen si punë të ngjashme. Pra, ato punime që ka paraqitur kompania, nuk janë të ngjashme me ato që kërkon tenderi. Ndërsa për shoqërinë “Shendelli” shpk, ku thuhet se nuk ka paraqitur dokumentet e duhura. Dhe jo më kotë arsyetimi i skualifikimit bëhet vetëm për këto dy kompani, pasi janë të vetmet që kanë paraqitur ofertat me vlerë më të vogël se fituesi. Konkretisht “Ardmir” shpk & “ASI-2A co” shpk, kanë ofruar 11,641,734 lekë të reja ose rreth 120 milionë lekë të vjetra, ndërsa “Shendelli” shpk me ofertë 12,241,208 lekë të reja, ose rreth 123 milionë lekë të vjetra. Për 12 kompanitë e mbetura nuk tregohet arsyeja se pse janë skualifikuar.
Duke qenë se kjo procedurë ka shumë hije dyshimi, edhe “Open Data” e ka shoqëruar këtë tender me flamur të kuq, me argumentin e skualifikimit të të gjithë operatorëve konkurrues përveç fituesit. Dhënia e tenderëve pa respektuar rregullat e prokurimit, është kthyer në një sport të zakonshëm nga Bashkia e Lali Erit. Arbitri që duhet t’i monitoroj këto procedura, që në këtë rast është Autoriteti i Konkurrencës, bën rolin e të verbrit dhe lë drejtuesit e institucioneve, të bëjnë çfarë të duan me taksat e qytetarëve.
Gijotina.com
Discussion about this post