Në fillim të vitit 2023, kryebashkiaku i Tiranës, Erion Veliaj, i dha kompanisë “Atelier 4” të Alban Eftimiu një tender pa garë kompanisë me fond limit rreth 117 milionë lekë të vjetra, për të përgatitur studimin për përmirësimin e korsive ekzistuese të biçikletave dhe shtimin e tyre në rrugët e kryeqytetit.
Një vit më pas, në Janar të vitit 2024, Bashkia e Tiranës shpall në Regjistrin e Parashikimeve të Prokurimeve Publike saktësisht të njëjtin tender, “Studimi dhe Projektimi i elementëve të sigurisë rrugore për rrjetin ekzistues të korsive të biçikletave, përmirësimi, shtimin dhe kompletimin e tyre”.
Kësaj radhe fondi limit është më i lartë, 134 milionë lekë të vjetra.
Informacionet siguruara nga “Gijotina” krijojnë dyshime se kryebashkiaku Veliaj po dublon të njëjtin tender, pra po shpenzon dy herë qindra milionë lekë publike, për të njëjtën punë.
Për të kuptuar më mirë mbi këto veprime që duken si “makinacione” të Veliajt dhe Bashkisë së Tiranës, shohim dokumentat.
Tenderi i parë
Në Dhjetor të vitit 2022, Bashkia e Tiranës shpalli tenderin “Studimi dhe Projektimi i elementëve të sigurisë rrugore për rrjetin ekzistues të korsive të biçikletave, përmirësimi, shtimin dhe kompletimin e tyre”, me fond limit 11 752 000 lekë të reja.
Në dokumentat e atij tenderi thuhej shprehimisht: “Projekti përfshin rreth 38 km korsi ekzistuese për biçikleta dhe mundësinë e zgjerimit me 23 km të kësaj infrastrukture për plotësimin e “MinGrid” të parashikuar …”.
Ky investim ishte i parashikuar në Planifikimin Buxhetor Afatmesëm 2022-2024, të miratuar nga Bashkia e Tiranës.
Siç lexohet në dokumentat e tenderit, studimi i kërkuar nga stafi i Veliajt parashikonte projektimin për korsitë ekzistuese të biçikletave, si edhe mundësinë e zgjerimit të tyre me 23 kilometra të tjera.
Në tender morën pjesë tre operatorë ekonomikë: “Zenit & Co”; bashkimi ndërmjet “Seed Consulting” e “Atelier 4”; dhe bashkimi ndërmjet “Tower” e “Igroup” shpk.
Kompania “Zenit” u përjashtua që në fazën e parë të tenderit. Sipas të dhënave zyrtare, “Seed-Atelier 4” paraqitën ofertën 115 milionë lekë të vjetra. Ndërsa konkurenti tjetër, “Tower-Igroup” dhanë ofertën më të ulët, 107.6 milionë lekë të vjetra.
Por, në mënyrë të habitshme, Bashkia e Tiranës shpalli fitues bashkimin e operatorëve me ofertë më të lartë, ku bënte pjesë edhe shoqëria “Atelier 4” e mikut të kryeministrit Edi Rama, Alban Eftimi.
Bashkia e Veliajt e argumentoi këtë rezultat, duke e renditur të parën studion e Eftimiut, në bazë të një sistemi pikëzimi. Sipas përllogaritjeve të Veliajt dhe vartësve të tij, Eftimiu, megjithëse me ofertën më të lartë, kishte marrë 271.8 pikë.
Ndërsa konkurenti rival, i cili kishte paraqitur ofertën me vlerë 7 milionë lekë më të ulët, kishte marrë 217.2 pikë. Diferenca me vetëm 0.06 pikë i dha tenderin 110 milionë lekë Eftimiut dhe kompanisë tjetër “Seed”, e cila kishte hyrë si bashkëpunëtore në procedurën për studimin dhe projektimin e elementëve të sigurisë rrugore për korsitë ekzistuese të biçikletave.
Kontrata për këtë shërbim u nënshkrua në Shkurt të vitit 2023 dhe u publikua në Buletinin e Prokurimeve Publike. “Gijotina” konsultoi të dhënat e Komisionit të Prokurimeve Publike dhe nuk rezultoi ndonjë e dhënë për ankimim të mundshëm të kësaj procedure.
Kjo do të thotë se ajo kontratë ka vlerë ligjore dhe duhet të zbatohet.
Por, çfarë ndodh? Një vit më pas, e konkretisht në 18 Janar 2024, Bashkia e Tiranës publikon në Regjistrin e Parashikimeve të Prokurimeve Publike saktësisht të njëjtën procedurë: “Studimi dhe Projektimi i elementëve të sigurisë rrugore për rrjetin ekzistues të korsive të biçikletave, përmirësimi, shtimin dhe kompletimin e tyre”.
Ndërsa fondi limit është rreth 20 milionë lekë të vjetra më i lartë se tenderi i mëparshëm-134 milionë lekë të vjetra.
Të dhënat në Regjistrin e Parashikimeve, në përgjithësi janë sipërfaqësore. Dokumentat më të detajuar publikohen në momentin e shpalljes së tenderit, për të cilin Bashkia e Tiranës ka vlerësuar ta hapë brenda vitit 2024.
Megjithatë, të dhënat e deritanishme mjaftojnë për të kuptuar se ka diçka që nuk shkon.
Tenderi i ri, siç u përmend, parashikon “studim dhe projektim i elementëve të sigurisë rrugore për korsitë ekzistuese….”.
Saktësisht, këtë shërbim e ofronte edhe tenderi i parë, i mbyllur në Shkurt 2023. Pra, çfarë do të sjellë ndryshe ky tender i ri? Vetëm, nëse Veliaj ka paracaktuar që edhe këtë fond t’ia jap sërish mikut Alban Eftimi, për një shërbim, të cilin arkitekti e ka fituar një herë, një vit më parë.
Informacionet e deritanishme ngrejnë dyshime të forta se tenderi i dytë, i cili pritet të shpallet së shpejti, është fiktiv. Pasi, Bashkia e Tiranës po kërkon sërish një shërbim, të cilin e ka prokuruar jo më larg se një vit më parë.
Megjithatë, mbetet për t’u parë se çfarë synon Veliaj me këtë tender të ri, kur Bashkia e Tiranës të publikojë dokumentat e procedurës.
Discussion about this post