Çudirat e bashkive me procedurat e paligjshme nuk paskan fund. Teksa “trofeun” për dhënien e tenderëve pa garë e mban bashkia e Erion Veliajt, së fundmi këtë zakon kanë filluar ta përvetësojnë edhe bashkitë lokale më të vogla.
Edhe pse në dukje jo shumë e njohur për procedurat tenderuese të paligjshme, Bashkia Maliq duket se ka bërë një lëvizje qesharake duke përfituar nga fondi i shtetit.
Sezoni i pranverës ka vetëm pak kohë që ka nisur, ndërsa Bashkia Maliq ka dhënë një tender për “Blerje materiale për ngrohje dru zjarri”.
Procedura e siguruar nga gijotina.com mban numrin e referencës REF-24399-04-07-2022 dhe mbishkrimin “mungesë konkurrence”.
Fitues është shpallur automatikisht kompania “MORAVA-L” shpk. Në kohë pranvere Bashkia Maliq ka menduar të japë tender me vlerë 5 475 000 (pesë milionë e katërqind e gjashtëdhjetë e gjashtë mijë e shtatëqind e pesëdhjetë) lekë pa TVSh ose rreth 55 milionë lekë të vjetra për blerjen e materialeve për ngrohje dru zjarri.
“MORAVA-L” shpk jo më kot u zgjodh para afatit të caktuar fitues i këtij tenderi, pasi shfaqi ofertën më të leverdishme për Bashkinë duke përjashtuar operatorët e tjerë ekonomikë.
Kryetari i Bashkisë Maliq Gëzim Topçiu e di që tenderi vetëm me një ofrues nuk mund të zhvillohet pasi ka cenuar konkurrencën dhe gara nuk duhet të vazhdojë, e megjithatë ka shpallur fitues kompaninë e privilegjuar.
Siç edhe kemi specifikuar në artikujt tanë, ky tender i është shtuar listës së gjatë të procedurave të paligjshme në një kohë kur buxheti i shtetit është duke u përballur me një serë emergjencash kriza energjetike si dhe rritja e çmimeve të ushqimeve dhe karburantit. A.L/ gijotina.com.
Discussion about this post