Autoriteti Rrugor Shqiptar (ARRSH), institucion i cili drejtohet nga Evis Berberi ka organizuar tender pa garë me vlerë 1,3 milionë euro duke shpallur fitues bashkimin e kompanive “R.S.&M” shpk dhe “SI.SI-AL” shpk në 9 maj.
Pavarësisht se shkelen procedurat e prokurimit publik, pavarësisht se nuk është bërë garë për fondet publike, pavarësisht se të dyja kompanitë kanë bërë shkelur ligjin e Prokurimit Publik para dy muajsh në bashkëpunim me bashkinë e Tiranës, përsëri paratë publike shkojnë në drejtim të tyre.
Të dyja kompanitë janë në emër të Nikolla Çaçit dhe Stefan Çaçi, babë e bir të cilët nuk e kanë herën e parë që marrin një tender pa garë me vlerë 1,61 miliardë lekë të vjetra pa TVSH.
Kontrata me numër REF-23691-03-31-2022 me fondin limit 1,65 miliardë lekë të vjetra pa TVSH për përmirësimin e Sinjalistikës Horizontale, Vertikale dhe Pajisjeve të Sigurisë Rrugore në Akset e Rajonit Qëndror Loti 2 (2022) nga kërkimet e redaksisë Gijotina.com nuk rezulton e vetmja e cila është fituar pa garë apo me skualifikim konkurrentësh.
Në 17 janar të dyja këto kompani u përshinë në një skandal me vlerë 91 milionë lekë të vjetra për plotësim me sinjalistik të blloqeve të parkimit për rezidentet nga Tirana Parking, institucion në varësi të bashkisë Tiranë.
Në një kohë që tenderi duhej anuluar, vartësit e Erion Veliajt kanë vazhduar me procedurat, duke përzgjedhur një prej dy kompanive të së njëjtës familje ku dy biznesmenët, nga e njëjta familje, kanë konkurruar kundra njëri-tjetrit.
Në fund, tenderi u fituaa nga kompania e Stefan Çaçi, “SI-SI.AL” shpk, e cila kishte përballë kompaninë “RSM” shpk në pronësi të babait të tij, Nikolla Çaçi. E gjithë procedura ishte në shkelje flagrante të ligjit “Për Prokurimin Publik”.
Ky ligj, në nenin 19 të tij, parashikon se përbëjnë konflikt interesi rastet kur për të njëjtën procedurë konkurojnë mes tyre kompani në pronësi të personave familjarë me njëri-tjetrin.
Në këto situata, Autoriteti Kontraktor duhet të refuzojë ofertat, para se të zhvillohet tenderi. Por, në rastin konkret, është zhvilluar procedura dhe në 24 Janar 2022 janë botuar rezultatet në Buletinin e Agjencisë së Prokurimit Publik.
Gjithashtu ligji për “Prokurimet Publike” parashikon se autoritetet kontraktore, pasi vihen në dijeni për lidhjet familjare mes konkurentëve rivalë, i njofton ata për përjashtimin nga procedura por në këtë rast vetëm pas publikimit të lajmit në media, tenderi është anuluar në 7 shkurt.
Kompania “RSM” është krijuar në vitin 2013 dhe zotërohet nga Nikolla Çaçi ndërsa kompania “SISI AL”shpk është krijuar në vitin 2007 dhe është në pronësi të djalit të tij, Stefan Çaçi, i cili ka qënë vetëm 18 vjeç kur u regjistrua në listën e biznesmenëve në Shqipëri.
Deri më sot kompania “SI.SI-AL” shpk ka qënë fituese në tendera me vlerë totale 2,4 milionë euro të cilat janë klasifikuar me flamur të kuq nga Open Data Albania me dyshime të forta për korrupsion dhe favorizim.
Discussion about this post