Bashkia Mat e cila drejtohet nga ish-komandanti i gardës në protestën e 21 Janarit, Agron Malaj ka realizuar tender pa garë për “shërbim mirëmbajtje dhe pjesë këmbimi të automjeteve” me vlerë 88 milion lekë të vjetra pa TVSH duke shpallur automatikisht fitues Imer Millkurti. Kjo procedurë prokurimi është me numër REF-21936-03-15-2022 e ka shpallur procedurën në 16 mars por si në rastet e mëparshme nuk ka patur konkurrent në këtë garë.
Në dokumentat standarte të dokumentit përfshihet servis për mjetet e bashkisë por ajo që bën përshtypje është fakti se është e vështirë të përcaktohet sasija e gjërave që do prokurohen.
“Duke qënë se Autoriteti Kontraktor e ka objektivisht të pamundur që të përcaktojë saktë sasinë që do të prokurohet, pavarësisht se ka kryer një parashikim se për çfarë shërbimesh dhe pjesë këmbimi mund të ketë nevojë gjatë zbatimit të marrëveshjes kuadër, ku këto sasi janë vetëm orientuese” –shkruhet duke nënkuptuar që sasitë për bateri apo për gjërat e tjera është e paqartë duke sjellë ekspozim për korrupsion.
Nga kërkimet tona rezulton se nuk është hera e parë që Imer Millkurti merr tendera me mungesë konkurrencë. Problemi me këta tendera është fakti se paraqesin rrezik të lartë për korrupsion dhe klientelizëm sipas Open Data Albania. Konkretisht datën 30 mars 2021 është shpallur përsëri fitues për tenderin me numër REF-88980-03-03-2021 me vlerë 14 milionë lekë të vjetra pa TVSH për shërbim mirëmbajtje duke shmangur konkurrentët në një procedurë që sjell dyshime të forta për korrupsion.
Dyshimet bëhen më të forta kur në krye të bashkisë është Agron Malaj i cili ka qenë komandant seksioni i Njësisë Speciale të Gardës së Republikës në protestën e 21 Janarit. Ai ishte një ndër 10 oficerët e shkarkuar nga ish-ministri i Brendshëm, Saimir Tahiri, kur sapo ky i fundit mori detyrën. 10 oficerët ishin pjesëtarë të “grupit të zjarrit”, të cilët qëlluan mbi protestuesit në tubimin ku mbetën katër qytetarë të vrarë.
Në lidhje me akuzat për ngjarjen e 21-janarit Rama ka deklaruar se Agron Malaj nuk ka lidhje me ngjarjen. Pasi u largua në vitin 2013 nga Garda ai nisi karrierë politike, pasi u bë pjesë e Partisë Socialiste. Më vonë ai u emërua kryetar i Partisë Socialiste për Matin dhe në të njëjtën kohë mori edhe detyrën e drejtorit të OSHEE-së për këtë rreth. Në fushatën e zgjedhjeve lokale të 23 qershorit 2015 ai doli në krah të kryeministrit Edi Rama për të kërkuar votat për kandidaten socialiste. Tashmë ai mban detyrën si kryebashkiak i Matit.
Nga viti 2016 e në vazhdim kjo bashki ka organizuar 22 milionë euro tendera fitues pa TVSH duke qënë në qendër të vëmendjes nga qeveritë e Rilindjes. Megjithatë arsyet e zemërgjerësisë së qeverisë fshihen tek procedurat e prokurimit ku 10,3 milionë euro, pra gati gjysma e këtyre tenderave janë klasifikuar si tendera problematikë me rrezik për korrupsion sipas Open Data.
Discussion about this post