Shëndetësia nuk ndal tenderat pa garë ku radhën e ka kompania “ALBAPHOTO” shpk në pronësi të Alban Xhaferit për tenderin me vlerë 16 milionë lekë të vjetra pa TVSH nga Qendra Shëndetësore nr.3.
Presidenti i Vllaznisë nuk ka fituar një kontratë me vlerë të lartë nëse e krahasojmë me skandalet e shëndetësisë por mungesa e konkurrentëve ngre dyshime për tenderin. Problemi nuk është vetëm ky tender por historiku i kompanisë “Albaphoto” shpk me sektorin e shëndetësisë dhe numri i lartë procedurash të shenjuara me flamur të kuq nga Open Data Albania. Alban Xhaferi është biznesmen që ka ekskluzivitetin e kompanisë japoneze të fotografisë dhe imazhit, prodhimit të pajisjeve mjekësore dhe produkteve të ndryshme teknologjike dhe farmaceutike, “FujiFilm” por nuk ka arsye që midis kompanisë “Albaphoto” shpk dhe sektorit të shëndetësisë të ketë tendera me negocim pa njoftim.
Nga kërkimet tona doli në pah një problem i vjetër të cilën kryeministri Rama e ka quajtur të zgjidhur nga qeveria por ngelet problem i bashkive. Ky problem që është shfaqur në sektorin më të përfolur të qeverisë, është procedura me negocim pa njoftim e cila është quajtur nga kryeministri Rama si “kancer që ha lekë” nga fondet publike.
Konkretisht tenderi me numër REF-18937-02-07-2022 me vlerë 10 milionë lekë të vjetra me TVSH i cili është organizuar nga spitali “Nënë Tereza” në 24 shkurt 2022 si procedurë me negocim pa njoftim. Është e qartë që urdhri i kryeministrit është injoruar jo vetëm njëherë por përsëri me një tender tjetër me numër REF-18940-02-07-2022 me vlerë 7,1 milionë lekë me TVSH përsëri nga QSUNT. Këta lloj tenderash kanë flamur të dyfishtë sepse ka mungesë konkurrence dhe është procedurë me negocim duke sjellë rrezik të lartë për korrupsion dhe klientelizëm.
Megjithatë tenderat e dyshimtë nuk janë kaq, kësaj liste i shtohen dhe tenderi me numër REF-98827-06-23-2021 me vlerë 97 milionë lekë të vjetra pa TVSH i shpallur në datën 13 korrik 2021. Në tender kemi mungesë konkurrence duke u shpallur fituese automatikisht përsëri kompania “Albaphoto” shpk të cilin e organizoi Drejtoria e Spitalit Rajonal Shkodër.
Por Drejtoria e Spitalit Rajonal Shkodër nuk ndalet me kaq sepse shpall fituese përsëri kompaninë e presidentit të Vllaznisë për tenderin me numër REF-50902-02-19-2020 me vlerë 83 milonë lekë të vjetra pa TVSH. Problemi qëndron në faktin se kompanitë e tjera që kanë marrë pjesë në tender janë skualifikuar duke shpallur automatikisht fituese “Albaphoto” shpk.
Deri më sot kompania e Alban Xhaferit ka fituar 24 tendera me flamuj të kuq të cilët kapin vlerën e 540 milionë lekëve të vjetra pa TVSH dhe vlera e këtyre lekëve mbart rreziqe për korrupsion dhe sjellje antiligjore sipas Open Data Albania.
Discussion about this post