Shëndetësia nuk kuron dot “sëmundjen” e tenderave pa garë, një anomali e cila rëndon fondet publike ku tenderi i radhës i organizuar nga Shërbimi Kombëtar i Urgjencës, ka shkuar për sigurimin e Qendrës Kombëtare të Urgjencës Mjekësore (QKUM) tek “Alb- Siguracion”, kompani sigurimesh ku pronari kryesor është Shefqet Kastrati.
Procedura e tenderit me numër REF-21984-03-15-2022 e realizuar në 30 Mars nuk është risi për sektorin e shëndetësisë, aq më pak për Kastratin që para pak ditësh gllabëroi tenderin e karburanteve nga Agjencia e Blerjeve të Përqendruara me vlerë 6.5 milionë euro pa garë, institucion në varësi të Ministrisë së Brendshme.
Problemi nuk është vetëm procedura e cila ka të shumtën e kohës mungesë konkurrentësh, metodë me të cilën fitohen tenderat pa garë por fakti se kudo shfaqen kompanitë e ndryshme në pronësi të të njëjtit emër, Shefqet Kastrati. Të fitosh tendera me shumicë nuk është shkelje ligji por t’i fitosh pa patur konkurrentë sjell dyshime për sjellje favorizuese ose antiligjore.
Ajo që bën përshtypje është se kompania në fjalë ka përfituar kontrata me vlerë të papërfillshme po ta krahasojmë me tenderat e karburanteve por pasuria fshihet në qindarka dhe nëse bëjmë llogaritë nga 12 tenderat e fituar tek shëndetësia, vlera arrin rreth 225 mijë euro pa TVSH. Nga kërkimet tona, siguracionet përfshijnë spitalin e Durrësit, spitalin e Traumës dhe vetëm një nga këta tendera rezulton pa flamur të kuq nga Open Data ndërsa e gjitha pjesa tjetër ka mungesë konkurrence.
Ajo që i bën më të forta dyshimet për korrupsion dhe favorizim nga institucionet shtetërore karshi kompanisë është diferenca e të gjitha fondeve limite me ofertat fituese e cila është një shifër qesharake, rreth 700 euro. Pra, nga 225 mijë euro tendera me taksat që u merren shqiptarëve, janë kursyer vetëm 0,3%, një menaxhim skandaloz i fondeve publike.
Megjithatë qeverisja qendrore nuk është i vetmi pushtet që i hap rrugën kompanisë “Alb- Siguracion” të Shefqet Kastratit pasi tentakulat e saj shtrihen dhe tek qeverisja vendore ku bamirësja kryesore është bashkia e Tiranës e cila nën drejtimin e Erion Veliaj, të shumtën e kohës e mban “satelitin” e kthyer nga Kastrati. Tenderi që Erion Veliaj i ka dhënë kësaj kompanie ka qënë për shpenzimet e siguracionit të mjeteve të transportit të bashkisë ku si zakonisht ka patur mungesë konkurrence për vlerën e 72 milionë lekë të vjetra pa TVSH.
Tenderi me numër REF-00672-07-09-2021 është një nga disa tenderat me flamur të kuq i cili sipas vlerësimit të Open Data Albania krijon dyshime të forta për korrupsion dhe klientelizëm.
Nga 73 tendera të organizuar në nivel bashkish me vlerë 720 milionë lekë të vjetra pa TVSH, të 73 tenderat janë fituar nga kompania “Alb- Siguracion” ku pjesa më e madhe e sigurimit të koshave të bashkisë Tiranë janë eksluzivitet i saj duke mos patur konkurrentë, të cilët mesa duket nuk e marrin iniciativën të konkurrojnë sepse Kastrati nuk njeh rivalë ose institucionet shtetërore janë miope përballë kësaj anomalie e cila thith taksat e shqiptarëve.
Discussion about this post