Sektori i shëndetësisë organizon tenderin e radhës pa garë duke i dhënë mirëmbajtjen e pajisjeve të Spitalit Rajonal të Gjirokastrës me vlerë 103 milionë lekë të vjetra pa TVSH kompanisë Fedos Shpk.
Shpallja e fituesit në 23 mars 2022 nga institucioni prokurues nuk është se bëri shumë bujë, por mungesa e konkurrentëve, përsëritja e këtij fenomeni me po të njëjtën kompani nuk u anashkalua.
Tenderët kanë nevojë për konkurrencën në mënyrë që shqiptarët të marrin shërbimin që paguajnë sepse siç shkruhet shpesh nëpër kontratat e shëndetësisë, operatori ekonomik nuk mund të vonohet apo të gabojë në shërbime të cilat janë jetike dhe vendimtare në shëndetin e njeriut. Kombinimi i këtyre faktorëve janë indikatorë të fortë për sjellje korruptive, në sektorin që është kthyer në hemorragjinë e arkës së shtetit, barra e të cilës bie mbi shqiptarët.
Megjithatë shëndetësia dhe qeveria, të dyja njëkohësisht nuk janë ndërgjegjësuar për procedurat e prokurimit për kompaninë Fedos Shpk e cila ka si pronar Orion Strugën. Madje qeveria shqiptare ka shkelur ligjin për Fedos shpk dhe simotrat e saj sipas Open Data Albania gjatë pandemisë me tenderat sekretë. Organizata AIS promotore e Open Data Albania, doli në deklaratë për shtyp ku e cilësoi këtë procedurë të qeverisë Rama si antikushtetuese, jo ligjore, jo të përligjur dhe në cënim të parimeve bazë të mirëqeverisjes.
Vetëm gjatë pandemisë janë firmosur 15 kontrata të cilat janë klasifikuar “sekret”. 14 prej këtyre kontratave janë organizuar nga Ministria e Shëndetësisë dhe vetëm një nga Ministria e Drejtësisë.
Pikërisht të vetmin tender të organizuar nga Ministria e Drejtësisë për “Blerje materiale mjekësore në kuadër të masave për parandalimin e përhapjes së virusit COVID-19” sipas VKM nr. 276, datë 6.4.2020 me vlerë 450 mijë euro pa TVSH e ka fituar Fedos shpk.
Në tenderin sekret, ashtu si tenderi i Spitalit Rajonal të Gjirokastrës nuk ka konkurrentë dhe mbi të gjitha nuk dihet asgjë rreth kontratës përveç vlerës dhe titullit duke e lënë çdo gjë në dorë të qeverisë ku institucionet audituese bashkë me median dhe shoqërinë civile e kanë të vështirë të verifikojnë zbatueshmërinë e këtij procesi.
Deri më sot Fedos shpk ka marrë 98 tendera me flamuj të kuq sepse konkurrentët janë skualifikuar ose ka patur mungesë konkurrence për kontrata që kapin vlerën e 3 milionë eurove pa TVSH për të cilat sipas “openprocurement.al” ka dyshime të forta për sjellje abuzive dhe antiligjore.
Discussion about this post